Read Buka Helaga (Hiri Motu) 1993 ESODO 34 Bible Online

ESODO 34 - Buka Helaga (Hiri Motu) 1993 bible

ESODO 34

¹Lohiabada ese Mose ia hamaoroa, ia gwau, “Nadi palaka rua ma do oi abia, nadi gunadia hegeregerena, oi hamakohia gaudia. Bona lau ese revareva ma do lau torea lou, guna lau torea hereva hegeregerena.

²Kerukeru dabai unai nadi ruaosi do oi abia hegaegae, bona Sinai Ororo do oi daekau mai, lauegu vairana dekenai do oi gini, ororo ena ataiai momokani gabunai.

³Tau ta ese oi do ia bamoa lasi, bona tau ta lasi ese inai ororo dekenai do ia gini. Bona mamoe bona boromakau be inai ororo kahirakahira rei do idia tahua lasi.”

⁴Vadaeni Mose ese nadi palaka rua ma ia utua, unai gunadia hegeregerena. Daba rere neganai Mose ia toreisi, Sinai Ororo dekenai ia daekau lou. Lohiabada ese ia oda henia hegeregerena, Mose ese unai nadi palaka ruaosi ia abia daekau.

⁵Lohiabada be ori lalonai ia diho, bona Mose ena badibadinai ia gini, ororo ena ataiai dekenai. Lohiabada ese sibona ena ladana helagana ia gwauraia, Lohiabada.

⁶Vadaeni Lohiabada ese Mose kahirakahira ia raka hanaia, bona ia boiboi inai bamona, ia gwau, “Lau be Lohiabada. Lau Lohiabada be bogahisihisi bona hariharibada Diravana. Lau be badu dekenai lau haraga lasi, to bogahisihisi bona lalokau dekenai lau be haraga.

⁷Taunimanima momo herea dekenai lau bogahisihisi henia noho, bona kara dika, bona kara kerere idauidau lau gwauatao noho. To kerere momokani taudia do lau panisia. Bona tamadia edia kara dika davana be edia natudia dekenai do lau henia, bona edia tubudia dekenai do lau henia, ia lao bona uru toi o uru hani idia ore.”

⁸Vadaeni Mose be tano dekenai ia tui diho haraga, ia tomadiho henia.

⁹Ia gwau, “Lohiabada e, bema lau dekenai oi ura henia, mani emu kara ai danu do ita lao. Momokani inai taunimanima be laloa hekokoroku taudia, to lau ura aiemai kerere bona kara dika do oi gwauatao, bona oiemu bese taudia korikori mani do oi halaoa ai.”

¹⁰Lohiabada ese Mose ia hamaoroa, ia gwau, “Harihari lau ura Israela taudia danu gwauhamata taravatuna mai laloa tamona do ita karaia. Oiemu orea taudia edia vairana dekenai hoa karadia do lau karaia. Inai bamona hoa karadia be guna lau hedinaraia lasi bese idauidau taudia dekenai. Unai dainai unai hoa karadia, lau Lohiabada ese do lau karaia gaudia idia itaia neganai, inai bese idauidau taudia do idia gari bada. Momokani, umui durua totona do lau karaia gaudia, be gari gaudia.

¹¹Hari dina umui dekenai do lau henia taravatu ibounai do umui badinaia. Lau be umui emui vairana dekenai do lau lao, Amoro taudia, bona Kanana taudia, bona Hiti taudia, bona Perisi taudia, bona Hivi taudia, bona Iebusu taudia do lau lulua momokani.

¹²Do umui naria namonamo, do umui lao gabudia edia noho taudia danu do umui gwauhamata karaia lasi, hekwakwanai dekenai do umui moru garina.

¹³Lasi momokani, to edia boubou patadia do umui hadikaia ore, edia kaivakuku do umui makohia, bona edia hahine dirava Asera ena laulau gaudia do umui utua diho.

¹⁴“Umui ese lau sibona do umui tomadiho henia, idau dirava ta do umui tomadiho henia lasi. Badina lau be Lohiabada, bona lau ura lasi idau dirava ta ese lau do ia hereaia.

¹⁵Unai dainai umui naria namonamo, unai tano noho taudia danu do umui gwauhamata lasi, o laloa tamona lasi. Badina be edia dirava koikoi idia tomadiho henia bona boubou henia neganai umui danu do idia boiria garina. Bona idia dekena amo do umui siri, umui danu ese edia dirava dekenai idia henia boubou edia vamu do umui ania garina.

¹⁶Bona Israela taudia edia natudia tau ese unai bese idauidau hahine do idia adavaia lasi. Badina unai hahine ese edia dirava idia tomadiho henia neganai, unai Israela taudia ese lau do idia rakatania, vadaeni edia adavana edia dirava do idia tomadiho henia garina.

¹⁷“Dirava koikoi ena laulauna, auri dekenai idia karaia gaudia, be do umui karaia lasi. Bona do umui tomadiho henidia lasi.

¹⁸“Hatubua Gauna Lasi Paraoa ena aria do umui badinaia noho. Dina 7 lalonai hatubua lasi paraoa sibona do umui ania, umui lau hadibaia vadaeni hegeregerena. Do umui ania negana korikori be hua ladana Abiba neganai, badina be hua Abiba neganai umui be Aigupito umui rakatania.

¹⁹Vara guna memero ibounai be lauegu. Boromakau natudia tau vara guna gaudia bona mamoe natudia tau vara guna gaudia danu be lauegu.

²⁰To bema umui ura emui doniki, vara guna gauna do umui hoia lou, iena davana do umui henia, mamoe ena natuna ta. To bema iena davana umui karaia lasi, unai doniki ena aiona do umui makohia. Bona umui emui vara guna natuna memero ibounai edia davana do umui karaia. “Bema tau ta be mai ena harihari gauna lasi, ia be lauegu vairana dekenai do ia hedinarai lasi.

²¹“Dina 6 do umui gaukara, to dina namba 7 be do umui laga-ani. Uma karaia totona tano makohia neganai, bona anina haboua neganai danu, be dina namba 7 dekenai do umui laga-ani.

²²“Anina utua ena aria do umui karaia, uiti umui utua hamatamaia neganai. Bona lagani dokona ena aria do umui karaia, uma ena anina umui haboua haorea neganai.

²³“Lagani ta ta ibounai lalonai umui emui tatau ibounai be nega toi lau, Lohiabada, Israela ena Dirava egu vairanai do idia hedinarai.

²⁴Badina be lau ese bese idauidau do lau lulua momokani umui emui vairana dekena amo, bona emui tano be do lau habadaia. Bema lagani ta ta ibounai lalonai nega toi Lohiabada emui Dirava ena vairanai umui hedinarai neganai, tau ta ese emui tano do ia abia kava lasi.

²⁵“Boromakau o mamoe lau dekenai umui henia boubou totona neganai, paraoa mai hatubua muramurana danu do umui henia lasi. Pasova ena aria totona idia alaia ubua gauna ta ena vamu kahana ta be do umui dogoatao lasi ia lao bona kerukeru.

²⁶“Lagani ta ta ibounai emui uma anina ia mage guna gauna be Lohiabada ena ruma dekenai do umui mailaia. Nani ena natuna be iena sinana ena rata lalonai do umui nadua lasi.”

²⁷Lohiabada ese Mose ia hamaoroa, ia gwau, “Inai hereva be do oi torea, badina be inai hereva dekena amo lau be oi bona Israela taudia danu gwauhamata taravatuna do ita karaia.”

²⁸Dina 40 bona hanuaboi 40 Mose be ororo dekenai Lohiabada danu ia noho. Aniani ia ania lasi, ranu danu ia inua lasi. Unai neganai Dirava ese gwauhamata taravatuna ena hereva nadi palakadia rua dekenai ia torea, Taravatu 10 be unai.

²⁹Mose be Sinai Ororo dekena amo ia diho mai neganai, ia ese nadi rua ia abia mai, idia latanai Taravatu 10 idia torea gaudia. Ia be Dirava danu ia herevahereva dainai, Mose ena vairana ia diaridiari noho. To Mose ia diba lasi iena vairana be unai bamona.

³⁰Arona bona Israela taudia ibounai ese Mose idia itaia, iena vairana ia diaridiari, vadaeni ia kahirakahira idia raka lasi, idia gari dainai.

³¹To Mose be idia dekenai ia boiboi, vadaeni Arona bona Israela gunalaia taudia ibounai be ia dekenai idia haboua. Bona Mose ese idia dekenai ia hereva henia.

³²Gabeai Israela taudia ibounai ese Mose kahirakahira idia haboua lao. Vadaeni Lohiabada ese Sinai Ororo ena latanai ia dekenai ia henia Taravatu ibounai be Mose ese ia gwauraia hedinarai idia dekenai.

³³Iena hereva ia hadokoa murinai, Mose ese iena vairana be dabua dekenai ia koua.

³⁴To Dirava ena Palai Ruma dekenai ia raka vareai, Lohiabada dekenai do ia hereva henia totona neganai, Mose be unai dabua iena vairana dekena amo ia kokia. Ia raka murimuri neganai, Mose ese Lohiabada ia hadibaia vadaeni taravatudia be Israela taudia dekenai ia gwauraia hedinarai.

³⁵To Israela taudia ese Mose ena vairana idia itaia, ia diaridiari. Vadaeni Mose be dabua dekenai iena vairana ia koua lou, ela bona Lohiabada ena hereva kamonai totona Palai Ruma dekenai ia raka vareai lou.