Read Buka Helaga (Hiri Motu) 1993 ESODO 35 Bible Online

ESODO 35 - Buka Helaga (Hiri Motu) 1993 bible

ESODO 35

¹Mose ese Israela taudia ibounai ia boiridia hebou, vadaeni inai bamona ia hamaoroa, ia gwau, “Lohiabada ena taravatu umui dekenai be inai:

²Pura ibounai lalonai dina 6 do umui gaukara, to dina namba 7 be do ia helaga. Ia be Dina Helagana bona laga-ani ena dina, lau Lohiabada egu dina. Bema tau ta be unai dina dekenai ia gaukara neganai ia be do umui alaia mase.

³Lahi be do umui karaia lasi emui ruma dekenai Sabati Dina dekenai.”

⁴Mose ese Israela taudia ibounai ia hamaoroa, ia gwau, “Lohiabada ena oda ita dekenai be inai:

⁵Lau Lohiabada dekenai harihari gauna do umui henia. Harihari gaudia idia ura idia henia taudia ibounai ese golo bona siliva bona auri laboralabora do idia mailaia.

⁶Ma inai gaudia danu do umui henia: Dabua, edia kala bulu, bona kakakaka sisina, bona kakakaka bona kurokuro, nani edia huina,

⁷mamoe edia kopina, edia kala kakakaka, bona nani edia kopina, akasia audia,

⁸lamepa ena oela, bona Dirava ena dehoro helagana totona muramura, bona muramura mai edia bonana namona, do idia gabua gaudia,

⁹onuku nadi namodia, bona hahelagaia taudia edia epodi dabua, bona edia kemena dabua herahera totona nadi namodia.

¹⁰“Gaukara diba momo taudia, emui huanai idia noho diba bada taudia ese do idia haboua, bona lau Lohiabada ese lau oda hegeregerena, inai gau ibounai do umui karaia:

¹¹Palai Dubu, bona iena guhi bona koua dabua, iena kimai, iena haba turia, iena reirei latadia, iena du bona du do idia gini dekenai maua gaudia.

¹²Taravatu Maua, Maua huaia audia, Maua ena koua gauna, bona koua dabua helagana, Taravatu Maua ia hunia gauna.

¹³Pata helagana, bona huaia totona audia, bona pata dekenai atoa gaudia, bona lau Dirava dekenai henia beredi helagana.

¹⁴“Lamepa dogoatao gauna, diari totona gauna, mai ena kohu, lamepa mai edia oela.

¹⁵Muramura patana, bona huaia totona audia, Dirava ena dehoro helaga, mai bonana namona muramura pauda, Palai Dubu ena iduara dekenai koua dabua.

¹⁶Boubou patana, vamu boubou gaudia gabua totona patana, mai ena auri laboralabora dekena amo idia karaia reke bamona gauna, au rakuraku gabua patana unai, be do umui karaia. Boubou patana huaia totona audia, bona boubou patana dekenai ia noho kohu danu do umui karaia. Huria totona ranu ena disi, mai ena patana danu do umui karaia.

¹⁷Koua dabua, Palai Dubu ia hagegea gauna, bona ena iduara ia koua dabua, bona inai koua dabua ena du, mai du idia gini lalonai maua danu do umui karaia.

¹⁸Palai Dubu bona koua dabua edia varo bona varo edia ikoko danu do umui karaia.

¹⁹Hahelagaia taudia edia dabua namo herea, Helaga Gabuna dekenai idia gaukara neganai idia atoa dabua danu do umui karaia. Inai be dabua helagadia, Arona bona iena natuna tau edia.”

²⁰Vadaeni Israela taudia ese Mose idia rakatania.

²¹Bona harihari gaudia idia ura idia henia taudia ibounai ese edia harihari gaudia be Lohiabada dekenai idia mailaia, Palai Dubu do idia haginia totona. Idia ese ma Palai Dubu lalonai do idia noho gaudia bona kohu, bona dabua helagadia karaia gaudia danu idia mailaia.

²²Idia ura harihari gaudia idia henia taudia, tatau bona hahine ese golo gaudia idauidau idia mailaia, pini bona taiana herahera, bona ageva, bona rini. Idia ibounai ese sibona edia harihari gaudia Lohiabada dekenai idia henia.

²³Bona mai edia dabua taudia, edia dabua kala bulu, kakakaka sisina, o kakakaka momokani, o kurokuro, Lohiabada henia totona idia mailaia. Haida danu ese nani huina, bona mamoe edia kopina, idia kakakaka karaia gaudia, bona nani edia kopina idia mailaia.

²⁴Mai edia siliva bona mai edia auri laboralabora taudia ibounai ese danu edia siliva bona auri laboralabora Lohiabada dekenai idia henia. Bona mai edia akasia audia, idia gaukaralaia diba audia, taudia danu ese unai audia idia henia.

²⁵Dabua gaukara idia diba hahine ibounai ese danu dabua idia hatua, bona idia karaia vadaeni gaudia idia mailaia, dabua namo herea edia kala bulu, kakakaka sisina, bona kakakaka momokani, bona kurokuro.

²⁶Bona idia ese nani edia huina idia mogea bona idia hatua.

²⁷Iduhu edia lohia ese onuku nadi, bona hahelagaia taudia edia dabua helagadia herahera totona nadi namodia idia mailaia. Unai dabua helagadia be epodi bona kemena dabua.

²⁸Unai lohia taudia ese danu bonana namona muramura, bona lamepa ena oela, bona dehoro helagana ena olive dehoro, bona bonana namona muramura pauda idia mailaia.

²⁹Israela taudia, harihari gaudia idia ura mailaia taudia ibounai, ese unai gau idia mailaia, Lohiabada ese Mose ia oda henia do ia karaia gaukara totona.

³⁰Mose ese Israela taudia ia hamaoroa, ia gwau, “Umui itaia, Lohiabada ese Besalele, Uri ena natuna, Huru ena tubuna, Iuda iduhu tauna, ia abia hidi vadaeni.

³¹Dirava ese iena Lauma ena siahu be Besalele dekenai ia henia vadaeni, laloa goada bona aonega danu. Gaukara namodia, herahera karaia gaukara idauidau ena diba danu Lohiabada ese ia henia.

³²Unai dainai ia be toana namodia idauidau herahera, golo, siliva bona auri laboralabora gaudia karaia totona, ena diba be bada.

³³Nadi namodia, herahera gaudia, au koroa, bona herahera karaia gaukara idauidau danu be Besalele ia diba momo.

³⁴Bona Lohiabada ese Besalele bona Oholiaba, Ahisamaka ena natuna, Dano ena iduhu tauna ruaosi, dekenai ma hadibaia gaukara diba ia henia. Vadaeni idia ruaosi ese edia gaukara namona ena diba be taunimanima haida dekenai idia hadibaia.

³⁵Lohiabada ese inai tau ruaosi dekenai diba bada ia henidia, bona idia ese gaukara taudia idia hadibaia. Vadaeni unai gaukara taudia ese nadi utua, revareva bona herahera karaia gaukara, mamoe huina dabua hatua, bona dabua turia, dabua namodia edia kala bulu, kakakaka sisina, bona kakakaka momokani idia karaia. Idia ibounai ese diba bona aonega idia davaria, inai gaukara idauidau ibounai do idia karaia totona.