Read Buka Helaga (Hiri Motu) 1993 ESODO 37 Bible Online

ESODO 37 - Buka Helaga (Hiri Motu) 1993 bible

ESODO 37

¹Besalele ese akasia au dekena amo Taravatu Maua ia karaia. Maua ena lata be 110 sentamita, ena lababa be 66 sentamita, bona ena ataiai be 66 sentamita.

²Maua ena lalona bona ena murimuri kahana ibounai be golo namona momokani dekenai ia koua, bona Maua ena hetoana be golo dekenai ia hagegea, herahera toana bamona.

³Bona Besalele ese rini ibounai 4, golo dekena amo ia karaia, Maua do idia huaia totona. Inai rini 4 be Maua ena aena maragidia 4 dekenai ia kwatua auka. Rini rua be Maua kahana dekenai ia kwatua, ma rini rua be Maua kahana dekenai ia kwatua.

⁴Maua huaia audia rua danu akasia au dekenai danu ia karaia, bona inai au ruaosi be golo dekenai ia koua.

⁵Inai au ruaosi be rini lalonai ia toia vareai, Maua kahana kahana dekenai, Maua do idia huaia totona.

⁶Maua ena koua gauna, kara dika gwauatao gabuna, danu golo namo herea momokani dekena amo ia karaia. Iena lata be 110 sentamita, bona iena lababa be 66 sentamita.

⁷Ma golo, hama dekenai ia botaia golo dekena amo kerubi aneru rua danu ia karaia. Inai kerubi be Maua ena koua gauna ena duduna duduna dekenai do umui koroa kau.

⁸Koua gauna ena duduna ta dekenai be kerubi aneru ta ia atoa, ma duduna ta dekenai be kerubi aneru ma ta ia atoa. Koua gauna bona kerubi ruaosi be golo tamona dekena amo ia karaia, idia be gau tamona, parara lasi.

⁹Inai kerubi aneru ese edia hanina dekena amo koua gauna idia hunia bamona, bona inai kerubi aneru ruaosi ese ta ta dekenai edia vairana idia itaia noho.

¹⁰Pata ta danu Besalele ese ia karaia, akasia au dekena amo ia karaia. Pata ena lata be 88 sentamita, bona iena lababa be 44 sentamita. Iena ataiai be 66 sentamita.

¹¹Golo namo momokani dekena amo ia koua, bona pata ena hetoana be golo dekenai ia hagegea, herahera toana bamona.

¹²Pata ena isena be ia ese ia habadaia 8 sentamita dekenai, bona inai isena be golo dekenai ia koua.

¹³Pata huaia totona rini ibounai 4 ia karaia, bona pata ena kona 4, aena gabudia dekenai ia kwatua auka.

¹⁴Inai rini be pata ena isena kahirakahira ia kwatua auka. Inai rini lalonai pata huaia audia idia toia vareai.

¹⁵Pata huaia audia be akasia au dekenai ia karaia, bona golo dekenai ia koua.

¹⁶Pata dekenai atoa gaudia danu, mereki, kapusi, disi bona uro, uaina boubou totona gaudia be golo namo momokani dekena amo ia karaia.

¹⁷Lamepa dogoatao gauna ta danu be golo namo herea dekena amo ia karaia. Iena badina bona iena du be golo, hama dekenai idia botaia gauna, dekena amo ia karaia. Iena rigi mai edia herahera ibounai danu be golo tamona dekena amo ia karaia.

¹⁸Iena rigi be ibounai 6, kahana toi, kahana toi.

¹⁹Inai rigi ta ta ibounai be mai edia herahera toi, edia toana be alamono au huahua bamona.

²⁰Lamepa ena du danu be mai ena herahera, herahera 4, edia toana be alamono au huahua bamona.

²¹Rigi rua rua dekenai danu be herahera matamata ta ta ia koroa, rigi rua, herahera ta, rigi rua, herahera ta, bona rigi rua, herahera ta, rigi edia henuna kahadia dekenai.

²²Inai rigi ibounai, bona edia herahera gaudia ibounai, be lamepa patana danu golo tamona dekena amo ia koroa.

²³Lamepa ibounai 7 ia karaia, bona edia gabudia dekenai ia atoa. Lamepa hagoevaia gaudia bona momoru udaia mereki ibounai danu be golo namo herea dekena amo ia karaia.

²⁴Inai lamepa dogoatao gauna, mai ena kohu ibounai totona ia gaukaralaia golo ena metau be ibounai 35 kilogaram.

²⁵Pata helagana ta ia karaia, muramura mai bonana namona gabua gauna. Akasia audia dekena amo ia karaia. Pata ena lata be 45 sentamita, bona iena lababa danu be 45 sentamita, bona iena ataiai be 90 sentamita. Pata ena kona 4 dekenai be doa 4 ia koroa karaia. Inai doa be pata danu au tamona dekena amo ia karaia.

²⁶Pata ena kopina be golo namo herea dekena amo ia koua, iena ataiai, iena kahana 4, bona iena doa 4 danu. Pata ena isena be golo herahera dekena amo ia ese ia koua hagegea.

²⁷Rini rua be golo dekena amo ia karaia, bona pata ena isena henunai ia kwatua, ta pata ena kahana dekenai, ma ta pata ena kahana dekenai. Pata huaia totona au rua be inai rini rua lalonai ia toia vareai.

²⁸Pata huaia audia rua be akasia audia dekena amo ia karaia, bona golo dekena amo inai au ia koua.

²⁹Bona ia ese dehoro helagana ia karaia, Dirava dekenai idia helaga taudia edia kwarana dekenai idia bubua dehoro be unai. Ma ia ese mai bonana namona muramura pauda, idia gabua gauna, ia mikisi namonamo.