Read Buka Helaga (Hiri Motu) 1993 ESODO 39 Bible Online

ESODO 39 - Buka Helaga (Hiri Motu) 1993 bible

ESODO 39

¹Idia ese dabua namodia mo-mo-kani, edia kala bulu, kaka-kaka sisina, bona kakakaka momokani idia karaia. Inai dabua namodia be hahelagaia taudia edia, bona Helaga Gabuna dekenai idia gaukara neganai, inai dabua idia atoa. Arona ena dabua helagadia danu idia karaia. Edia gaukara be Lohiabada ese Mose ia hamaoroa hegeregerena.

²Epodi dabua danu be dabua namo herea dekena amo idia karaia, ena kala be bulu, kakakaka sisina, bona kakakaka momokani. Golo varona danu be dabua danu idia hatua hebou.

³Idia ese golo be hama dekenai idia botaia palaka, pepa bamona. Vadaeni idia utua maragi, varo maragina bamona. Bona unai dabua bulu, kakakaka sisina, bona kakakaka momokani, danu be inai golo varo dekenai idia turia hebou.

⁴Epodi ena ataiai kona ruaosi dekenai be varo rua idia turia kau, tau ena pagana dekenai do idia kwatua totona.

⁵Gaba gauna danu be epodi idia karaia gaudia hegeregerena idia karaia, golo varo, bona dabua namona, ena kala bulu, kakakaka sisina, bona kakakaka momokani. Inai idia hatua karaia, be Lohiabada ese Mose ia hamaoroa hegeregerena.

⁶Onuku nadi rua idia abia hegaegae, bona golo dekena amo inai nadi dogoatao gabudia idia karaia. Inai nadi ruaosi dekenai be Iakobo ena natuna tau 12 edia ladana idia torea namonamo.

⁷Inai nadi be epodi ena varo ruaosi, pagana gaudia dekenai idia kwatua kau. Vadaeni inai nadi ese Israela ena iduhu 12 edia toana idia lao, Lohiabada ese Mose ia hamaoroa hegeregerena.

⁸Kemena dabua maragina be epodi idia karaia dabua hegeregerena dekena amo idia karaia, bona ena herahera be epodi ena turia herahera hegeregerena danu.

⁹Kemena dabua ena lata be 44 sentamita bona iena lababa be 22 sentamita. Dabua ena huana momokani dekenai idia lokua, vadaeni ia be poketi badana ta hegeregerena, iena lata be 22 sentamita, iena lababa danu be 22 sentamita.

¹⁰Dabua ena latanai davana bada herea nadi ibounai 12, laini 4 dekenai idia turia kau. Laini ginigunana dekenai be sadio, topasio bona barekete nadi idia turia kau.

¹¹Laini iharuana dekenai be samaragi, sapairo bona vasiga nadi idia turia kau.

¹²Laini ihatoina dekenai be huakinto, akate, bona ametuso nadi idia turia kau.

¹³Laini namba 4 dekenai be berulio, onuku, bona iasipa nadi idia turia kau. Inai nadi ibounai be golo, mai herahera toana danu dekena amo idia hagegea namonamo.

¹⁴Inai nadi 12 ta ta ibounai dekenai Iakobo ena natuna tau ta ta edia ladana idia torea, Israela ena iduhu ta ta ibounai edia toana be unai.

¹⁵Kemena dabua totona golo namo herea idia mogea namonamo, bona seini rua, varo bamona, idia karaia, dabua be kemena dekenai do idia kwatua totona.

¹⁶Golo herahera, rini dogoatao totona gaudia rua, bona golo rini rua idia karaia, bona kemena dabua ena ataiai kona ruaosi dekenai idia kwatua kau.

¹⁷Inai golo seini ruaosi be inai golo rini ruaosi dekenai idia kwatua kau.

¹⁸Inai golo seini edia duduna be epodi ena rini dogoatao golo herahera gaudia ruaosi dekenai idia kwatua. Inai dekena amo kemena dabua be epodi ena paga varo ruaosi dekenai idia kwatua.

¹⁹Ma rini rua golo dekena amo idia karaia, bona kemena dabua ena henuna kona ruaosi dekenai idia kwatua, kemena dabua ena murina kahanai, bona epodi kahirakahira.

²⁰Bona rini rua golo dekena amo ma idia karaia, bona epodi vairanai, ena paga dogoatao gaudia dekenai idia turia kau, gaba gauna kahirakahira.

²¹Vadaeni Lohiabada ese Mose ia hamaoroa hegeregerena, kemena dabua ena rini ruaosi, bona epodi ena rini ruaosi idia kwatua hebou, bulu varona dekena amo. Inai dala dekenai kemena dabua be epodi ena gaba gauna dekenai ia kamokau, idia marere kava lasi.

²²Epodi ena henunai atoa dabua latana ta, be dabua ena kala bulu dekena amo idia karaia.

²³Dabua ena huanai be matuna idia karaia, kwarana atoa gabuna be unai. Bona matuna ena isena danu idia turia namonamo, do ia darea garina.

²⁴Inai dabua latana ena henuna isena dekenai herahera namodia idia turia, edia toana be apolo huahua bona edia kala be bulu, kakakaka sisina, bona kakakaka momokani. Inai apolo edia huanai be golo gaba maragidia idia turia kau.

²⁵Golo gaba ta, apolo huahua ta, golo gaba ta, apolo huahua ta, unai bamona idia turia karaia, ela bona dabua latana ena isena herahera idia karaia haorea.

²⁶Arona ese iena gaukara helagana ia karaia negadia ibounai inai dabua latana do ia kwatua. Inai dabua latana idia karaia be Lohiabada ese Mose ia hamaoroa hegeregerena.

²⁷Ma Arona mai ena natuna tau totona sioti idia karaia.

²⁸Edia kwara kumia gaudia, bona kwara gaudia, bona edia piripou danu be dabua auka namo herea dekena amo idia karaia.

²⁹Edia gaba gaudia danu be dabua auka namo herea, ena kala bulu, kakakaka sisina, bona kakakaka momokani, mai edia herahera, idia karaia, Lohiabada ese Mose ia oda henia hegeregerena.

³⁰Vadaeni medolo, helaga momo-kani ena toana gauna, be golo namo herea momokani dekena amo idia karaia, bona medolo dekenai hereva inai bamona idia torea: “Helaga, Lohiabada ena”.

³¹Varo, ena kala bulu idia abia, bona kwarana kumia dabua ena vairana dekenai unai medalo idia kwatua kau, Lohiabada ese Mose ia hamaoroa hegeregerena.

³²Palai Dubu, Lohiabada ia noho ena toana gabuna haginia gaukara be ia ore momokani. Israela taudia ese gaukara ibounai idia karaia vadaeni, Lohiabada ese Mose ia hamaoroa hegeregerena.

³³Israela taudia ese Palai Dubu, mai ena kohu ibounai idia mailaia, gaudia be inai: Iena kimai, iena haba turia, iena reirei latadia, iena du, bona du do idia gini lalonai maua gaudia.

³⁴Palai Dubu ena guhi rua, ta be mamoe tau ena kopina, ena kala be kakakaka, bona ta be davara ena boromakau, rui, ena kopina dekena amo. Inai be ataiai momokani ena guhi. Ma Taravatu Maua ia hunia koua dabua helagana, bona inai gaudia danu idia mailaia:

³⁵Taravatu Maua, nadi palaka rua ia koua Maua. Maua idia huaia totona audia ruaosi, bona Maua ena koua gauna.

³⁶Pata helagana, bona pata dekenai atoa gaudia, bona Dirava dekenai henia beredi helagana.

³⁷Lamepa dogoatao gauna, golo namo herea momokani dekena amo karaia gauna, iena lamepa, bona iena kohu ibounai, bona lamepa edia oela.

³⁸Muramura patana, golo gauna, bona taunimanima hahelagaia totona dehoro helagana, bona bonana namona muramura ena pauda, bona Palai Dubu ena iduara ena koua dabua.

³⁹Boubou patana, auri laboralabora gauna, mai ena reke bamona patana, auri laboralabora dekenai karaia gauna, mai ena huaia totona audia, bona mai ena kohu ibounai. Huria totona disi badana, mai ena patana.

⁴⁰Koua dabua, Palai Dubu ia hagegea gauna, bona inai koua dabua ena du, mai du idia gini lalonai maua danu. Inai koua dabua ena iduara ena koua dabua, mai ena varo danu, Palai Dubu ena varo edia ikoko, bona Palai Dubu lalonai idia gaukaralaia kohu ibounai.

⁴¹Bona hahelagaia taudia edia dabua namo herea, Helaga Gabuna dekenai idia gaukara neganai idia atoa dabua danu, idia mailaia. Inai be dabua helagadia, Arona bona iena natuna tau edia.

⁴²Israela taudia ese gaukara ibounai idia karaia vadaeni, Lohiabada ese Mose ia oda henia hegeregerena.

⁴³Mose ese inai gaudia ibounai ia itaia namonamo, bona ia diba gau ibounai idia karaia vadaeni namo herea, Lohiabada ese Mose ia oda henia hegeregerena. Vadaeni Mose ese unai Israela taudia ia hanamodia.