Read Buka Helaga (Hiri Motu) 1993 IOBU 11 Bible Online

IOBU 11 - Buka Helaga (Hiri Motu) 1993 bible

IOBU 11

¹Vadaeni Sopara, Namata tauna ia haere, ia gwau,

²“Inai tau ena hereva be do ita haere henia lasi, a? Tau ta ena hereva momo dainai, be maoromaoro tauna do idia gwauraia, a?

³Iobu e, oiemu hereva momo ese, taunimanima edia hereva do idia koua, a? Oi laloa hereva kava do oi gwauraia noho, bona ai ese oi dekenai do ai gwau henia lasi, a?

⁴Oi be Dirava dekenai oi gwau, ‘Egu hereva be maoromaoro momokani, bona oiemu vairana dekenai lau be goevagoeva.’

⁵To lau ura bada, Dirava ese oi dekenai do ia hereva henia. Ia ese oi dekenai do ia gwau henia be namo.

⁶Ia ese iena hunia dekenai ia noho aonega, be oi dekenai do ia hadibaia be namo. Iena aonega korikori ese, taunimanima edia diba ia hereaia noho. Kamonai, Dirava ese oiemu kerere davana ia henia noho, sisina sibona, to oiemu kerere davana korikori be ia bada.

⁷“Dirava ena laloa dobu gaudia, bona iena hunia gaudia oi davaria diba, a? Siahu Ibounai Dirava ena siahu ena bada oi tohoa diba, a?

⁸Dirava ena diba be ataiai herea, guba ena ataiai bamona. Edena bamona oi abia diba? Ma Dirava ena aonega be dobu herea, mase taudia edia gabu ena dobu ia hanaia. Oi be edena bamona do oi davaria diba?

⁹Dirava ena siahu bona iena goada edia lata ese, tanobada ena lata idia hanaia noho. Davara ena lababa danu idia hanaia noho.

¹⁰“Bema Dirava ese oi ia dogoatao, bona kota totona oi do ia abia lao neganai, daika ese Dirava ena kara do ia koua?

¹¹Koikoi taudia be Dirava ese ia diba, bona kara kerere taudia ia itaia neganai, ia ese idia ia laloa noho.

¹²Bema uda doniki hahine ia mara neganai, ia ese taunimanima ta ia havaraia diba, a? Bema unai bamona ia vara diba neganai, kavakava tauna be do ia aonega diba.

¹³“To bema oiemu kudouna oi hamaoromaoroa, bona Dirava dekenai oiemu imana do oi abia isi,

¹⁴bona bema oiemu kara dika bona kerere oi negea momokani, bona oiemu ruma taudia edia dika danu do oi koua,

¹⁵unai neganai oiemu vairana do oi abia isi lou, hemarai ta lasi, bona do oi gini goada, gari ta lasi.

¹⁶Bona unai neganai, oi ese oiemu kerere do oi laloaboio. Oi dekena amo do idia boio ore, abata ena ranu ia heau ore bamona.

¹⁷Oiemu mauri be do ia diari, ia ese dina ena diari do ia hereaia. Oiemu mauri ena dibura negadia, be daba rere bamona do idia diari.

¹⁸Oi be do oi noho namo, bona mai abidadama danu gau namodia do oi naria. Badina Dirava ese oi do ia naria, bona laga-ani oi dekenai do ia henia.

¹⁹Do oi hekure noho, badina tau ta ese oi do ia hagaria lasi, bona taunimanima momo ese oi do idia noia, oiemu hanamoa idia dekenai do oi henia totona.

²⁰To kara dika taudia do idia gari bada, edia heau mauri dalana ta do idia davaria lasi. Gau tamona sibona do idia naria, mase.”