Read Buka Helaga (Hiri Motu) 1993 IOBU 12 Bible Online

IOBU 12 - Buka Helaga (Hiri Motu) 1993 bible

IOBU 12

¹Vadaeni Iobu ia haere, ia gwau,

²“Momokani, emui diba be bada herea, a, bona do umui mase neganai, lau laloa, aonega ibounai do ia ore!

³Lasi momokani! Lau danu be mai egu aonega. Umui ese aonega dekenai lau umui hereaia lasi. Hari umui gwauraia gaudia be daika idia diba lasi?

⁴“Guna, Dirava ese egu noinoi ia kamonai, bona egu guriguri ia haere henia, badina lau be kara maoromaoro bona kerere lasi tauna. To harihari egu turana ese, lau dekenai idia kirikiri noho.

⁵Umui be mai emui hekwarahi ta lasi, to umui ese lau umui kirikirilaia noho. Umui ese kahirakahira ia moru tauna umui botaia noho.

⁶To henaoa taudia, be edia ruma dekenai idia noho mai maino danu, bona Dirava idia habadua noho taudia, be idia noho namonamo noho. Unai taudia ese sibodia edia diba bona goada idia laloa, bona idia ese unai, edia goada, be edia dirava tamona, idia halaoa.

⁷“To uda boromadia bona ataiai manudia ese, umui dekenai idia hadibaia diba.

⁸Tanobada ena avadia bona davara gwarume ese, umui dekenai do idia hamaoroa.

⁹Idia ibounai idia diba, Lohiabada ena imana ese idia ia karaia vadaeni.

¹⁰Dirava ena imana ese, mauri gaudia ibounai ia hakaua noho. Bona taunimanima ibounai edia mauri, be Dirava ena siahu henunai.

¹¹Emui uduna ese, aniani edia mamina idia tohoa noho bamona, emui taiana danu ese, hereva edia mamina idia tohoa noho.

¹²Aonega be taunimanima burukadia dekenai ia noho, bona edia lagani be momo taudia ese, diba bada idia davaria noho.

¹³“Aonega bona siahu be Dirava dekenai ia noho. Sisiba namona bona lalona kehoa momokani danu, be Dirava dekenai ia noho momokani.

¹⁴Bema Dirava ese ruma ta ia veria diho neganai, daika ese ia haginia lou diba? Bona bema Dirava ese, tau ta dibura dekenai ia koua neganai, daika ese unai tau do ia ruhaia diba?

¹⁵Bema Dirava ese medu ia siaia lasi neganai, hitolo ia vara noho. Bema Dirava ese medu bada ia siaia neganai, tanobada dekenai abata bada ia vara noho.

¹⁶Momokani Dirava be mai ena goada bona aonega danu. Koikoi tauna, bona ia idia koia taudia danu, be Dirava ena siahu henunai idia noho.

¹⁷Gunalaia taudia edia aonega, be Dirava ese ia haorea noho, bona kota biagudia, be Dirava ese ia hakavakavadia noho.

¹⁸King taudia edia dagi, be Dirava ese ia kokia noho, bona dibura taudia mai guia danu ia halaodia.

¹⁹Dirava ese hahelagaia taudia ia hamanaua, bona siahu taudia ia hamorua noho.

²⁰Taunimanima ese idia abidadama henia noho taudia, edia ududia be Dirava ese ia koua noho, bona tau badadia edia aonega, be Dirava ese ia kokia noho.

²¹Lohia taudia be Dirava ese ia hahemaraia noho, bona goada taudia edia goada ia haorea noho.

²²Dirava ese dobu gabudia edia hunia gaudia ia kehoa hedinaraia, bona dibura masemase gabudia ia hadiaria noho.

²³Ia ese tanobada besedia ia habadaia noho, bona ia hadikadia ore noho. Edia taunimanima ia hanamoa, idia be momo herea idia lao, bona unai murinai ia halusidia noho.

²⁴Dirava ese tanobada besedia edia lohia taudia, edia aonega ia kokia. Vadaeni ia siaidia lao, dala idia noho lasi tano dekenai idia loaloa kava noho.

²⁵Dibura lalonai idia hekwarahi kava, ma idia daradara, edia diari be lasi dainai. Idia raka kerere noho, kekero taudia bamona.”