Read Buka Helaga (Hiri Motu) 1993 IOBU 13 Bible Online

IOBU 13 - Buka Helaga (Hiri Motu) 1993 bible

IOBU 13

¹Ma Iobu ia gwau, “Inai gaudia ibounai lau itaia guna vadaeni, bona emui hereva ibounai be guna lau kamonai vadaeni.

²Umui diba gaudia be lau danu lau diba. Umui emui diba ese egu diba ia hereaia lasi.

³To lau ura Siahu Ibounai Dirava dekenai do lau hereva. Lau ura Dirava sibona danu, egu laloa gaudia do ai herevaherevalaia.

⁴To umui be koikoi hereva dekena amo, emui diba maragi umui hunia noho. Umui ibounai be dogeta namodia lasi bamona, tau ta umui hanamoa diba lasi.

⁵Regena lasi umui noho be namo. Unai bamona neganai, sedira haida ese aonega taudia umui do idia gwauraia.

⁶Harihari egu hereva do umui kamonai. Egu uduna ena noinoi mani do umui kamonai.

⁷Hereva maoromaoro lasi, be Dirava ena ladana dekenai do umui gwauraia, a? Hereva koikoi be Dirava dainai do umui gwauraia, a?

⁸Umui ese Dirava umui badinaia momokani, a? Dirava durua totona hereva umui gwauraia noho, a?

⁹Dirava ese umui ia tahua neganai, do ia davaria umui be namo, a? Umui ese Dirava umui koia diba, tau ta umui koia noho bamona, a?

¹⁰Bema lau dekenai umui durua koikoi, bona maka tamona dekenai lasi, unai neganai Dirava ese umui do ia gwau henia momokani.

¹¹Iena siahu bada herea ese umui ia hagaria lasi, a? Dirava dekenai umui gari lasi, a?

¹²Umui emui aonega herevadia be anina lasi, lahi ena kahu bamona. Emui hepapahuahu hereva be raro bamona, badina idia manoka noho.”

¹³Ma Iobu ia hereva, ia gwau, “Harihari do umui hereva lasi, vadaeni do lau hereva, bona lau dekenai do idia vara gaudia, be do idia vara.

¹⁴Lau diba mase be kahirakahira lau dekenai, to egu mauri atoa diho totona lau noho hegaegae inai.

¹⁵Momokani, Dirava ese sedira lau do ia alaia mase, to lau ese ia dekenai do lau abidadama henia noho. Bona iena vairana dekenai, egu kara do lau gwauraia, idia be maoro.

¹⁶Inai egu gari lasi kara ese sedira lau do ia hamauria, badina be Dirava idia laloa lasi taudia, be gari dainai, idia be Dirava ena vairanai do idia gini diba lasi.

¹⁷Egu hereva do umui kamonai namonamo, emui taiadia do umui kehoa momokani.

¹⁸Egu laloa korikori lau abia hegaegae vadaeni, bona lau diba egu maoromaoro do lau hamomokania.

¹⁹Umui ese lau umui samania diba, a? Bema umui ese egu kerere umui gwauraia diba, lau be regerege lasi do lau noho, bona do lau mase namo.

²⁰“Dirava e, gau rua sibona mani lau dekenai do oi henia, unai neganai oiemu vairana dekena amo, do lau hunia toho lasi.

²¹Lau do oi matakani henia noho lasi, bona oiemu gari karadia dekena amo, lau do oi hagaria lasi.

²²Unai neganai lau dekenai do oi boiboi, bona do lau haere. O, mani lau be oi dekenai do lau hereva, bona oi ese lau dekenai do oi haere.

²³Egu kara kerere bona egu kara dika be hida? Egu kerere bona egu kara dika, be lau dekenai do oi hadibaia.

²⁴Badina dahaka oiemu vairana, be lau dekena amo oi hunia noho? Badina dahaka oi dekenai tuari gwauraia tauna bamona lau oi halaoa?

²⁵Au raurauna ta, lai ese ia hodaia lao gauna, lau inai, be do oi hagaria, a? Oi ese rei kaukau do oi lulua lao, a?

²⁶Badina be oi ese lau samania totona, hereva mai edia mamina dika oi torea noho, bona egu kara dika, lau uhau neganai lau karaia gaudia, edia davana be do oi henia noho.

²⁷Egu aena be seini dekena amo oi guia noho, bona egu raka daladia ibounai oi itaia noho. Egu aena idia moia gabudia danu oi tahua noho.

²⁸“Taunimanima be idia ore lao noho, au ia bodaga lao bamona, o dabua ta, kaubebe ese idia ania ore gauna bamona.”