Read Buka Helaga (Hiri Motu) 1993 IOBU 14 Bible Online

IOBU 14 - Buka Helaga (Hiri Motu) 1993 bible

IOBU 14

¹Iobu ia gwau, “Ita ibounai, hahine edia bogana, dekena amo ita vara taudia, iseda mauri dinadia be momo lasi, bona iseda hekwarahi be bada herea.

²Ita tubu, vadaeni karaharaga ita kakoro, uma ena avadia bamona. Dina ena laulau bamona ita boio haraga, ita noho daudau lasi.

³Dirava e, lau oi itaia noho, a? Lau do oi kota henia, lauegu kerere davana do oi henia, a?

⁴Taunimanima be miro, bona goeva lasi. Goevagoeva gauna ta, be taunimanima dekena amo do ia vara diba, a?

⁵Taunimanima ena mauri dinadia, be Dirava ese ia gwauraia guna vadaeni. Hua hida do ia mauri noho? Dirava sibona ese unai ia gwauraia. Tau ta ese unai dala ia haidaua diba lasi.

⁶Unai dainai taunimanima dekena amo, mani do oi raka siri sisina, bona hekwarahi do oi henia lasi, vadaeni iena nega do ia moalelaia, bema mai dalana.

⁷“Au be mai ena mauri dalana, ani? Do idia utua kwadogi, vadaeni ma ia tubu lou diba. Ia dekenai be tubu gaudia maragidia idia vara diba.

⁸Au ena ramuna be sedira gunana momokani, bona iena badina be tano lalonai ia mase.

⁹To ranu do ia abia neganai, rigi matamata do idia vara, ava ena anina matamata ia tubu bamona.

¹⁰To tau be ia mase neganai, iena goada ia ore momokani, iena hahodi ia doko, vadaeni ia be edeseni?

¹¹Gohu ena ranu ia ore, bona sinavai ena ranu be ia kaukau lao bamona,

¹²unai bamona danu taunimanima be idia hekure, vadaeni idia toreisi lou lasi. Idia be do idia noga lou lasi, ela bona guba do ia boio. Bona edia mahuta dekena amo, tau ta ese idia do ia hanogaia diba lasi.

¹³“Lau ura mase gabuna dekenai lau do oi hunia. Mani lau do oi hunia, ela bona oiemu badu ia ore. Vadaeni nega ta do oi gwauraia, unai neganai oi ese lau do oi laloa.

¹⁴Bema tau ta ia mase, ia be do ia mauri lou, a? To lau ese nega namodia totona do lau naria noho. Do lau naria noho, ela bona inai hisihisi bona hekwarahi idia ore.

¹⁵Unai neganai oi ese lau dekenai do oi boiboi, vadaeni oi dekenai do lau haere, bona lau, oi ese oi karaia tauna dekenai, do oi moale noho.

¹⁶Bona egu raka gabudia ibounai do oi itaia namonamo, to egu kara dika be do oi laloa lasi.

¹⁷Oi ese egu kerere do oi gwauatao, do oi atodia siri, bona egu kara dika ibounai do oi kokia ore.

¹⁸“To ororo be do idia moru diho, bona nadi badadia momokani, be edia gabu dekena amo idia kokia.

¹⁹Ranu ese nadi ia hamaragia noho, bona abata ese tano ia kokia lao noho. Unai bamona danu oi ese taunimanima edia mauri namona, nega vairai abia totona gauna ena laloa, be oi ese oi haorea noho.

²⁰Oi ese taunimanima oi halusia hanaihanai, vadaeni idia boio. Idia edia vairana toana be idau, mase idia davaria dainai.

²¹Bema idia edia natuna taudia be dagi namodia idia abia, madi idia diba lasi.

²²Tau be ia sibona ena tauanina ena hisihisi ia mamia noho, bona ia sibona ena lalohisihisi dainai ia tai noho.”