Read Buka Helaga (Hiri Motu) 1993 IOBU 17 Bible Online

IOBU 17 - Buka Helaga (Hiri Motu) 1993 bible

IOBU 17

¹“Egu lauma ia makohia vadaeni, egu mauri dinadia be kahirakahira idia ore. Guria gabuna be lau totona ia noho hegaegae.

²Lau dekenai idia hereva dika taudia ese, lau idia hagegea noho. Egu matana ese edia badu karadia idia itaia noho.

³“Dirava e, lau be maoromaoro bona momokani. Egu hereva do oi abia dae. Tau ta ese egu hereva ia durua lasi,

⁴badina oi ese edia lalodia oi koua, bona idia laloa maoromaoro diba lasi. Unai dainai mani emu kara idia do oi durua lasi, vadaeni lau dekena amo do idia kwalimu lasi.

⁵Bema tau ese moni abia totona, iena turana ia samania neganai, unai tau ena natuna edia matadia do idia kepulu.

⁶“Taunimanima idia kirikirilaia gauna, be Dirava ese lau ia halaoa vadaeni. Idia ese egu vairana dekenai idia kanudi noho.

⁷Egu matana be kahirakahira idia kepulu, egu lalohisihisi dainai. Egu imana bona aena be idia maragi lao vadaeni, dina ena laulau ena toana bamona.

⁸Kara maoromaoro taudia ese inai idia itaia neganai, idia hoa mai gari danu, bona kerere lasi taudia ese do idia toreisi, Dirava laloa lasi taudia do idia koua totona.

⁹To kara maoromaoro tauna, be iena dala dekenai do ia raka noho, bona kara goevagoeva taudia edia goada, be do idia bada lao.

¹⁰“To umui ibounai, egu vairana dekenai umui gini noho taudia e, emui huana dekenai aonega tauna ta do lau davaria lasi.

¹¹Egu mauri dinadia idia ore vadaeni, bona lau ura karaia gaudia be do idia vara lasi.

¹²To egu turana idia gwau hanuaboi be dina. Dibura momokani sibona ia noho neganai idia gwau, ‘Diari be kahirakahira.’

¹³Egu dala tamona be inai: Mase gabuna be egu ruma do lau halaoa. Unuseni dibura lalonai do lau mahuta.

¹⁴Lau ese guria gabuna dekenai do lau hereva, do lau gwau, ‘Oi be egu tamana.’ Bona biluga dekenai do lau hereva, ‘Oi be egu sinana bona egu taihuna.’

¹⁵Gau namona ta lau naria noho diba, a? Daika ese egu gau namona ta ia itaia diba?

¹⁶Lasi, lau naria noho gau namona, be lau danu mase ena iduara lalonai do ia vareai lao. Ai ese tano ena kahu lalonai do ai diho hebou.”