Read Buka Helaga (Hiri Motu) 1993 IOBU 18 Bible Online

IOBU 18 - Buka Helaga (Hiri Motu) 1993 bible

IOBU 18

¹Vadaeni Biledada, Suhu tauna, ia haere, ia gwau,

²“Iobu e, inai hereva do oi gwauraia noho, ela bona edena negai? Do oi laloa namonamo, unai neganai ai be oi dekenai do ai hereva.

³Badina dahaka oi laloa ai be boromakau bamona? Badina dahaka oi laloa ai be kavakava?

⁴Oiemu badu ese oi sibona do ia hadikaia noho. To oiemu hisihisi dainai, taunimanima ibounai ese tanobada do idia rakatania, a? Dirava ese oi totona ororo do ia kokia, a?

⁵“Momokani, kara dika tauna ena diari be ia bodo vadaeni. Iena lahi ena hururu be ia diari lasi.

⁶Iena palai ruma lalonai diari be ia dibura. Iena ataiai ia noho lamepa be ia bodo vadaeni.

⁷Ia raka neganai, iena aena edia goada idia manoka lao. Ia sibona ia palania gauna ese, iena noho do ia hadikaia.

⁸Badina ia sibona ena aena ese, reke dekenai idia hakaua vareai. Ia loaloa kava, bona reke lalonai ia moru.

⁹Ia ese tarapu ia moia, bona tarapu ese iena aena ia dogoatao auka.

¹⁰Tano dekenai tarapu idia hunia vadaeni. Unai tarapu gauna, be unai tau ena raka dala dekenai ia noho, tau do ia abia totona.

¹¹Kahana ibounai dekena amo, gari gaudia ese unai tau idia hagaria noho. Iena raka gabudia ibounai dekenai idia lulua noho.

¹²Guna ia be kohu momo tauna, to hari ia be ia hitolo bada noho, bona ia moru neganai, hisihisi bada herea do ia davaria.

¹³Gorere ese iena kopina ia haorea noho. Gorere, ladana be ‘mase ena vara guna’, ese iena imana bona aena ia haorea noho.

¹⁴Ia ese iena ruma bona kohu ia abidadama henia, mauri namona do ia abia noho totona, to ia be ia mase, bona gari bada ena king dekenai do ia lao.

¹⁵Idau taunimanima be iena ruma dekenai do idia noho. To salipa dekenai unai ruma do idia hagoevaia guna.

¹⁶Unai tau dikana be au dikana bamona, iena ramuna be kaukau, henuna dekenai, bona iena rigina danu be kaukau, ataiai dekenai.

¹⁷Unai tau, be tanobada taudia do idia laloa lou lasi. Iena ladana be do idia laloaboio momokani.

¹⁸Mauri taudia edia gabu dekena amo do idia lulua siri. Diari gabuna dekena amo, dibura gabuna dekenai do idia lulua lao.

¹⁹Ia be natuna ta lasi, bona tubuna ta lasi, iena bese edia huanai. Guna ia noho gabunai, be iena varavara ta do ia noho lasi.

²⁰Dina diho kahana taudia ese, unai tau ena mase dekenai do idia hoa bada. Dina daekau kahana taudia ese danu, be do idia hoalaia mai gari bada danu.

²¹Momokani tau dikadia edia dokona be unai bamona. Dirava idia laloa sisina lasi taudia, edia mase be unai bamona.”