Read Buka Helaga (Hiri Motu) 1993 IOBU 22 Bible Online

IOBU 22 - Buka Helaga (Hiri Motu) 1993 bible

IOBU 22

¹Vadaeni Elipasa, Temana tauna, be ia haere, ia gwau,

²“Tau ta ese gau ta Dirava dekenai do ia henia diba, a? Aonega tauna ese Dirava ia durua diba, a?

³Oiemu kara maoromaoro dainai, Siahu Ibounai Dirava ia moale, a? Oiemu kara namodia ese, Dirava idia durua sisina diba, a?

⁴“Oi ese Dirava oi gari henia noho dainai, ia ese oi ia sisiba henia noho, bona ia ese oi ia kota henia noho, a?

⁵Lasi momokani, oiemu kara dika bona kerere bada dainai, sisiba bona matakani oi dekenai ia henia noho.

⁶Badina be oiemu tadikakana ese, iena abiatorehai ena davana ia henia lasi neganai, oi ese iena dabua oi abia, ia be dabua lasi.

⁷Manoka bona ranu mase taudia dekenai ranu oi henia lasi, bona hitolo taudia dekenai aniani oi henia lasi.

⁸To oiemu siahu bona oiemu dagi be idia bada dainai, oi ese tano ibounai oi abia, oiemu.

⁹Oi ese vabu taudia oi siaia lao, oi durua lasi. Tamana bona sinana lasi maragidia danu, be oi dagedage henia, bona idia dekena amo oi henaoa.

¹⁰Unai dainai tarapu momo ese oi idia hagegea noho, bona gari bada ese karaharaga oi dekenai ia ginidae.

¹¹Dibura ese danu oi ia koua noho, gau ta oi itaia diba lasi. Abata ese danu oi ia koua noho.

¹²“Dirava be guba ataiai ia noho lasi, a? Ataiai idia noho hisiu oi itaia, idia be ataiai momokani, ani?

¹³To oi ese oi nanadaia, oi gwau, ‘Dirava be dahaka ia diba? Ia be ori ese idia koua noho, edena bamona ai do ia kota henia diba?’

¹⁴Oi laloa unai ori ese Dirava idia koua, vadaeni ia ese guba dekenai ia raka noho neganai, tanobada gauna ta ia itaia lasi, a?

¹⁵Dala gunadia, kara dika taudia ese idia raka guna vadaeni dalana, be unai dala dekenai oi danu oi raka ani?

¹⁶Edia mauri negana do ia ore lasi neganai, abata ese ia kokidia lao, ia aladia ore.

¹⁷Inai taudia be Dirava dekenai idia gwau, ‘Oi ese ai do oi rakatania.’ Ma danu idia gwau, ‘Siahu Ibounai Dirava be dahaka do ia karaia diba ai dekenai?’

¹⁸To Dirava ese edia ruma, be gau namodia momo dekena amo ia hahonua. Unai dainai kara dika taudia edia laloa, be lau ura lasi momokani.

¹⁹“Kara dika taudia edia kerere davana idia abia neganai, tau namodia idia moale noho, bona kerere lasi taudia idia kiri noho, idia gwau,

²⁰‘Momokani kara dika taudia ese, dika idia davaria vadaeni, bona idia rakatania gaudia, be lahi ese ia gabua ore vadaeni.’

²¹“Iobu e, Dirava danu maino do oi karaia, bona iena ura do oi karaia. Unai neganai Dirava ese oi do ia hanamoa.

²²Dirava ena hadibaia hereva danu do oi abia dae, bona iena hereva, be oiemu kudouna ena lalonai do oi dogoatao noho.

²³Io, bema Siahu Ibounai Dirava dekenai oi giroa lou, bona bema oiemu ruma dekenai, oiemu bese idia karaia noho dika do oi koua neganai, Dirava ese oi do ia haginia lou.

²⁴Oiemu golo be tano ena kahu dekenai do oi negea, bona oiemu Opiri golo, be sinavai maragina ena nadi edia huanai do oi negea lao.

²⁵Siahu Ibounai Dirava be oiemu golo do oi halaoa, bona Dirava be oiemu siliva namo herea danu, do oi halaoa.

²⁶Unai neganai, oi ese nega ibounai Dirava do oi abidadama henia, bona do oi davaria, ia be oiemu moale ena badina momokani.

²⁷Oi be ia dekenai oi guriguri neganai, ia ese do ia kamonai henia, bona oi ese oiemu gwauhamata, be do oi karaia momokani.

²⁸Do oi karaia gaudia ibounai dekenai do oi kwalimu. bona oiemu dala ibounai, be diari ese do ia hadiaria.

²⁹Badina be Dirava ese, hekokoroku tauna ia atoa diho noho, to hekokoroku lasi tauna ia hamauria noho.

³⁰Bema oi be kerere lasi neganai, Dirava ese oi do ia hamauria. Oiemu kara be goevagoeva dainai, do oi heau mauri.”