Read Buka Helaga (Hiri Motu) 1993 IOBU 23 Bible Online

IOBU 23 - Buka Helaga (Hiri Motu) 1993 bible

IOBU 23

¹Vadaeni Iobu ia haere, ia gwau,

²“Lau be lau maumau noho Dirava dekenai. Mai lalohisihisi danu lau tai noho, to lau dekenai Dirava ena imana ia metau noho.

³Lau ura diba edeseni Dirava do lau davaria, unai neganai iena helai gabuna dekenai, do lau raka kahirakahira,

⁴bona lau sibona egu laloa, be Dirava ena vairana dekenai do lau gwauraia. Egu lalona durua totona hereva momo do lau gwauraia.

⁵Lau ura do lau diba, edena bamona egu hereva do ia haere henia, bona iena haere dekena amo, lau ura egu laloa do ia kehoa.

⁶Dirava ese mai ena goada ibounai dekena amo, lau do ia heai henia, a? Lasi, lau hereva neganai, ia ese lau do ia kamonai henia.

⁷Lau be kara maoromaoro tauna, bona unai dainai, lau be Dirava danu ai herevahereva diba. Ia ese egu maoromaoro do ia gwauraia momokani.

⁸“Dina ia daekau kahana dekenai Dirava lau tahua, to ia be lasi unuseni. Dina ia diho kahanai danu lau davaria lasi.

⁹Dirava be mirigini kahanai, bona diho kahanai danu ia gaukara vadaeni, to lau ese ia do lau itaia lasi.

¹⁰To Dirava ese egu lao dalana ia diba. Ia ese lau ia tohoa vadaeni murinai, lau be golo hegeregerena do lau raka lao.

¹¹Egu aena be Dirava ena aena gabudia, dekenai idia raka vadaeni. Iena dala lau badinaia vadaeni, lau raka siri lasi.

¹²Dirava ena oda be nega ta lau rakatania lasi. Iena ura lau karaia noho, egu ura be lau karaia lasi.

¹³“Ia sibona ia gini noho, bona daika ese iena ura ia koua diba? Iena ura hegeregerena ia karaia noho nega ibounai.

¹⁴Lau dekenai ia palani do ia karaia gaudia, be do ia karaia momokani, bona palani momo unai bamona ma do ia karaia momokani.

¹⁵Unai dainai iena vairana dekenai lau gari bada noho. Iena kara lau laloa neganai, lau gari bona lau heudeheude noho.

¹⁶Dirava ese egu laloa goada ia hamanokaia vadaeni. Siahu Ibounai Dirava ese, mai hoa danu lau ia hagaria vadaeni.

¹⁷Dirava ese dibura dekena amo lau ia hagaria vadaeni. Bona inai dibura bada ese, egu vairana ia koua, lau itaia diba lasi.”