Read Buka Helaga (Hiri Motu) 1993 IOBU 24 Bible Online

IOBU 24 - Buka Helaga (Hiri Motu) 1993 bible

IOBU 24

¹Iobu ma ia hereva, ia gwau, “Badina dahaka Siahu Ibounai Dirava ese, kota dinana ta ia gwauraia lasi? Badina dahaka Dirava idia badinaia taudia ese, unai dina totona idia naria kava noho?

²Taunimanima ese, tano ena hetoa idia makaia nadi idia kokia lao. Mamoe oreadia idia henaoa, bona idia edia mamoe edia huanai idia hunidia noho.

³Idia ese danu, tamana bona sinana lasi maragidia edia doniki idia henaoa, bona vabu ena abiatorehai, ena davana abia totona, iena boromakau tau idia abia lao.

⁴Idia ese ogogami taudia, be dala dekena amo idia doria siri. Unai dainai tanobada ena ogogami taudia ibounai, be idia hunia noho.

⁵Madi, ogogami taudia be uda doniki bamona, tano kaukau dekenai aniani idia tahua noho. Unai gabu sibona dekenai, edia natudia totona aniani idia davaria noho.

⁶Idia biagua lasi tano ena anina idia haboua noho, bona kara dika taudia edia vain uma, ena momoru danu idia haboua noho.

⁷Hanuaboi ena nega ibounai lalonai, kopina kavakava idia hekure noho, edia dabua be lasi dainai. Keru neganai idia be kouti ta lasi.

⁸Ororo dekenai ia diho medu ese ia hapariparidia, bona edia ruma be lasi dainai, idia be nadi badadia badibadinai idia hekure.

⁹Tau dikadia ese tamana lasi maragidia, be sinadia edia kemena dekena amo idia dadia noho, bona abiatorehai ena davana abia totona, idia ese ogogami tauna ena natuna idia abia lao.

¹⁰Ogogami taudia be kopina kavakava idia loaloa noho, edia dabua be lasi. Mai edia hitolo danu, uiti idia guia, bona idia huaia lao.

¹¹Idia ese danu kara dika tauna ena olive uma dekenai, olive dehoro idia karaia noho. Idia ese vain huahua idia moia gabuna dekenai, uaina idia karaia, to idia ranu mase noho.

¹²Hanua badadia lalonai idia mase noho taudia, bona bero idia davaria taudia, be durua totona idia tai noho, to Dirava ese edia noinoi ia kamonai henia lasi.

¹³“Taunimanima haida ese diari idia ura lasi momokani, diari ena dala idia diba lasi, bona unai dala dekenai idia raka lasi.

¹⁴Ala-ala tauna be daba rere neganai ia toreisi noho, ogogami taudia bona hitolo taudia do ia alaia totona, bona hanuaboi neganai henaoa karadia ia karaia.

¹⁵Heudahanai tauna ese, dina ia diho noho neganai ia naria noho. Ia gwau, ‘Tau ta ese lau do ia itaia lasi.’ Ia ese iena vairana ia koua noho.

¹⁶Hanuaboi neganai, henaoa taudia ese ruma idia hamakohia, to dina lalonai idia hunia noho, diari idia ura lasi momokani.

¹⁷Hanuaboi momokani be edia daba idia halaoa noho. Idia ese dibura ena gari dikadika gaudia danu, idia turana karaia noho.

¹⁸“To umui gwau: ‘Kara dika tauna be abata bada ese ia kokia lao, ia boio vadaeni, bona ia biagua tano, be Dirava ese ia hadikaia noho. Unai tau ese, iena vain uma dekenai gaukara totona do ia lao lou lasi.

¹⁹Sinou ese dina ena siahu bona medu lasi neganai, ia boio haraga bamona, kara dika tauna ese danu, be tanobada dekena amo do ia boio haraga.

²⁰Unai dika tauna be iena sinana danu ese, do ia laloatao lasi. Biluga ese iena tauanina idia ania noho, bona ia be makohia ore, ia moru auna bamona.’

²¹“Unai dika ia vara badina be, ia ese vabu taudia ia hadikaia, bona natuna idia havaraia diba lasi hahine taudia, be ia bogahisihisi henidia lasi dainai.

²²Dirava ese iena goada dekena amo, siahu taudia ia hadikaia ore noho. Dirava ese ia toreisi, vadaeni kara dika tauna ia mase.

²³Dirava ese sedira nega sisina lalonai, unai tau dekenai noho namo do ia henia, to iena dala be Dirava ese ia itaia noho nega ibounai.

²⁴Nega sisina sibona tau dikana ena noho be namo, to unai murinai ia boio ore, ia be ava ia mase bamona. Ia be do idia utua oho, uiti ena kwarana idia utua oho bamona.

²⁵“Bema inai be momokani lasi, daika ese lau be koikoi tauna do ia gwauraia diba? Daika ese do ia hedinaraia egu hereva be anina lasi?”