Read Buka Helaga (Hiri Motu) 1993 IOBU 26 Bible Online

IOBU 26 - Buka Helaga (Hiri Motu) 1993 bible

IOBU 26

¹Vadaeni Iobu ia haere, ia gwau,

²“Lau be goada lasi tauna momokani. Emui durua kara lau dekenai ena namo be dahaka?

³Emui sisiba hereva, lau, aonega lasi tauna, dekenai, ena namo be dahaka? Diba momo lau dekenai umui hadibaia vadaeni, a?

⁴Daika ena durua dekena amo, be umui ese inai hereva umui gwauraia? Bona emui uduna dekena amo, daika ena lauma ia hereva?

⁵“Mase taudia edia lauma be idia heudeheude noho, mase gabuna, davara henunai idia noho laumadia, ranu bona davara lalonai noho mase taudia danu.

⁶Badina Dirava ese mase taudia ia itaia namonamo. Hel ena kahana ibounai, be Dirava ese ia itaia namonamo noho, bona unuseni noho taudia idia hunia diba lasi.

⁷Dirava ese mirigini kahana dekenai guba ia karaia, gau lasi gabuna ena ataiai. Tanobada danu be ia ese ia karaia, gau lasi gabuna ena latanai.

⁸Dirava ese ori be ranu dekena amo ia hahonua, bona ia ese ori ia hagoadaia, vadaeni unai ranu ena metau ese ori ia makohia lasi.

⁹Dirava ese hua badana ena vairana ia koua, iena ori dekena amo hua badana ia koua noho.

¹⁰Davara badana ena hetoa laini, be Dirava ese ia karaia hagegea. Diari bona dibura edia hetoa gabuna be unai.

¹¹Dirava ese guba idia dogoatao du ia gwau henia neganai, idia be mai gari danu idia heudeheude noho.

¹²Dirava ese iena goada dekena amo davara ia hamanadaia, bona iena aonega dekena amo, davara ena dagedage gauna, Rahaba ia alaia ore.

¹³Dirava ena lai ese guba ia hagoevaia, bona Dirava ena imana ese, unai koboni, gaigai dagedagena ia gwadaia mase.

¹⁴Inai karadia, be Dirava dekenai kara maragidia sibona. Inai kara be iena sivarai ena kahana maragina sibona. To Dirava ena siahu momokani ena bada, be daika ia diba?”