Read Buka Helaga (Hiri Motu) 1993 IOBU 28 Bible Online

IOBU 28 - Buka Helaga (Hiri Motu) 1993 bible

IOBU 28

¹Ma Iobu ia hereva, ia gwau, “Taunimanima ese guri badadia idia geia noho, siliva abia totona. Golo idia hagoevaia gabudia danu idia noho.

²Taunimanima ese danu, auri be tano dekena amo idia geia noho. Bona auri laboralabora, be nadi idia havevea dekena amo idia abia noho.

³Taunimanima ese dibura momokani gabudia dekenai, diari idia atoa noho, bona dobu herea gabudia idia tahua noho, auri nadi unai dibura gabudia lalonai, do idia davaria totona.

⁴Taunimanima edia noho ruma gabudia be daudau, taunimanima edia aena idia raka lasi gabuna dekenai, be guri idia geia taudia ese auri idia tahua noho. Kwanau sibona idia dogoatao, bona dobu gabudia dekenai idia diho.

⁵Tano ena kopina dekenai aniani ia vara noho, to unai tano ena henuna momokani dekenai, iena toana be idau, lahi ese ia hadikaia bamona.

⁶Tano ena nadi lalonai, sapairo nadi namodia idia noho, bona tano ena kahu lalonai golo ia noho.

⁷Unai tano henunai daladia, be vamu ia tahua manu ta ese ia itaia lasi. Bogibada manu ena matana ese ia itaia lasi.

⁸Laiona ta, o dagedage gauna ta ese, unai henunai idia noho daladia dekenai idia raka lasi.

⁹Taunimanima ese nadi aukadia momokani idia geia diba. Idia ese ororo edia badina nadidia, be idia geia bona kokia lao noho.

¹⁰Nadi badadia dekenai dadaira idia geia, bona unai neganai, edia matadia ese davana bada nadidia idia itaia noho.

¹¹Taunimanima ese danu sinavai idia koua, bona ranu henunai ia noho tano lalonai, idia hunia noho davana bada gaudia idia hedinaraia noho.

¹²To aonega be edeseni do ita davaria? Laloa kehoa gabuna be edeseni ia noho?

¹³Taunimanima edia huanai aonega do ita davaria lasi. Tanobada ena mauri taudia edia huanai aonega ia noho lasi.

¹⁴Dobu gabuna bona davara badana ese idia gwau, ‘Aonega be ai dekenai ia noho lasi.’

¹⁵Golo bona siliva dekena amo, aonega ita hoia diba lasi.

¹⁶Opiri golo dekena amo, aonega ena davana ita karaia diba lasi. Onuku o sapairo nadidia danu ese, aonega ena davana idia karaia diba lasi.

¹⁷Aonega ena davana ese golo ena davana ia hereaia noho. Golo herahera o galasi namo herea dekena amo, aonega ita hoia diba lasi.

¹⁸Iasipa bona davara ena nadi namodia danu, be aonega hegeregerena lasi, rubi nadi danu be aonega ena davana ia hereaia lasi.

¹⁹Etiopia ena tapasio nadi, bona golo goevagoeva momokani edia davana, be aonega ena davana, hegeregerena do ita gwauraia diba lasi momokani.

²⁰“Vadaeni, aonega be edeseni dekena amo ia mai? Bona laloa kehoa ia noho gabuna be edeseni?

²¹Aonega be mauri gaudia ibounai, edia matadia dekena amo ia hunia noho. Bona ataiai idia roho noho manu ibounai danu, ese idia itaia diba lasi.

²²Dobu masemase gabuna ena aneru, bona Mase danu be idia gwau, ‘Aonega ena sivarai sisina sisina sibona, be ai kamonai vadaeni.’

²³Dirava sibona be aonega ia lao dalana ia diba. Ia sibona ese aonega ia noho gabuna ia diba.

²⁴Badina Dirava ese tanobada ena dokodia ia itaia noho. Guba henunai idia noho gaudia ibounai ia itaia noho.

²⁵Dirava ese lai ena goada ia henia neganai, bona ia ese davara ena bada ia gwauraia neganai,

²⁶bona Dirava ese medu do ia diho gabudia ia gwauraia, bona guba boiboi ena kevaru dalana ia karaia neganai,

²⁷ia ese aonega ia itaia, bona aonega ena namo ia tahua. Unai neganai Dirava ese aonega ia haginia, bona aonega ena namo ia gwauraia hedinarai momokani.

²⁸Bona Dirava ese taunimanima ia hamaoroa, ia gwau, ‘Kamonai, Lohiabada do umui gari henia, aonega be unai, bona kara dika do umui rakatania, laloa kehoa be unai.’ ”