Read Buka Helaga (Hiri Motu) 1993 IOBU 32 Bible Online

IOBU 32 - Buka Helaga (Hiri Motu) 1993 bible

IOBU 32

¹Vadaeni unai tau toiosi ese edia hereva Iobu dekenai idia hadokoa, badina be ia sibona ia hereva goada, ia gwau ia be maoromaoro.

²To Elihu Barakele, Busu tauna, Ramu iduhu tauna be ia badu. Ia ese Iobu ia badu henia, badina be ia sibona maoromaoro ia gwauraia, to ia ese Dirava be maoromaoro ia gwauraia lasi.

³Elihu ese danu Iobu ena turana toiosi dekenai ia badu, badina idia gwau Iobu be kerere, to ia dekenai idia haere henia dalana idia diba lasi.

⁴Elihu ese Iobu haere henia totona ia naria, badina idia ibounai be tau badadia, to ia be eregabe sibona.

⁵Elihu ese unai tau toiosi ia itaia, Iobu dekenai idia haere henia diba lasi neganai ia badu.

⁶Unai dainai Elihu Barakele, Busu tauna, ia hereva, ia gwau, “Lau be eregabe, to umui be tau badadia. Unai dainai lau be lau hemarai, bona egu laloa umui dekenai lau gwauraia be lau gari.

⁷Lau gwau, ‘Tau badadia do idia hereva be namo. Buruka taudia ese edia aonega do idia hadibaia be namo.’

⁸To Siahu Ibounai Dirava ena Lauma, be taunimanima dekenai ia mai, bona aonega ia henia noho idia dekenai.

⁹Tau buruka sibona mo ese aonega idia davaria lasi. Tau buruka sibona mo, be hereva maoromaoro idia diba lasi.

¹⁰“Unai dainai lau gwau: Egu hereva do umui kamonai. Lau danu egu laloa mani do lau gwauraia hedinarai.

¹¹Umui ese umui hereva neganai lau naria noho. Umui ese aonega hereva umui tahua noho, be lau kamonai.

¹²Lau kamonai namonamo, bona lau itaia, umui ta ese, Iobu ena hereva umui haere henia maoro diba lasi, bona Iobu ena hereva umui koua lasi.

¹³Edena bamona umui gwauraia diba, ‘Ai ese aonega ai davaria vadaeni?’ Dirava ese Iobu do ia haere henia be namo, badina umui karaia diba lasi.

¹⁴Iobu ese umui dekenai ia hereva henia, lau dekenai lasi. To umui haere henia dalana be maoro lasi, bona egu haere be do ia idau.

¹⁵“Iobu e, oiemu turana edia hereva idia ore, idia daradara noho. Edia haere dalana be hegeregere lasi.

¹⁶Idia hereva lasi noho, idia gini kava noho, haere ta lasi. Unai dainai lau be do lau naria noho, a?

¹⁷Lasi, lau danu be oi dekenai do lau haere. Egu laloa be oi dekenai do lau gwauraia,

¹⁸badina egu lalona be hereva dekena ia honu, bona egu lalona dekenai ia noho lauma ese, lau ia oda henia do lau hereva.

¹⁹Bema lau hereva lasi neganai, lau be kopina ta, uaina matamata dekenai ia honu bamona, bona do lau pou.

²⁰Mani lau be do lau hereva, unai neganai egu lalona do ia keru. Mani, egu uduna do lau kehoa, do lau hereva.

²¹Lau be maka tamona dekenai umui do lau hereva henia, bona tau ta do lau hanamoa koikoi lasi,

²²badina be hanamoa koikoi dalana lau diba lasi, bona bema unai bamona lau karaia, lau ia karaia Dirava ese lau do ia hamasea haraga.”