Read Buka Helaga (Hiri Motu) 1993 IOBU 35 Bible Online

IOBU 35 - Buka Helaga (Hiri Motu) 1993 bible

IOBU 35

¹Elihu ma ia hereva, ia gwau,

²“Iobu e, oi laloa inai be ia maoro, a? Oi be oi gwau, Dirava ena vairana dekenai oi be kerere lasi.

³Bona Dirava oi nanadaia, oi gwau, ‘Egu kara dika ese oi ia hadikaia diba, a? Egu kara dika lasi kara dekena amo, edena gau namona ta lau davaria, a?’

⁴“Lau ese oi dekenai do lau haere, bona oiemu turana taudia dekenai danu.

⁵Oiemu matana oi negea, guba do oi itaia. Ori do oi itaia, idia be ataiai, oi be henunai.

⁶Bema oi kara dika, unai kara dika ese Dirava ia hadikaia lasi. Bema nega momo kerere oi karaia, unai kerere ese dahaka ia karaia Dirava dekenai?

⁷Bema kara maoromaoro oi karaia, oi ese durua be Dirava dekenai oi henia? Oiemu imana dekena amo, Dirava be dahaka do ia abia?

⁸Oiemu kara dika ese, tau ta oi hegeregerena sibona ia hisihisi henia noho, bona oiemu kara namona ese, taunimanima sibona ia durua noho.

⁹“Dagedage karadia momo dainai, taunimanima be idia tai mai boiboi danu. Goada taudia dikadia edia imadia dekena amo, durua do idia abia totona, idia boiboi noho,

¹⁰to idia ese ia karadia Dirava dekenai idia taitai lasi. To momokani dika be ita dekenai ia vara neganai, unai Dirava ese ane ita dekenai ia henia noho diba.

¹¹Io, idia ese Dirava dekenai idia lao lasi, to ia ese ita dekenai aonega ia henia noho. Iseda aonega ese, mauri gaudia, bona ataiai manudia edia aonega ia hereaia noho.

¹²Unai taudia ese durua totona idia tai henia noho, to Dirava ese ia haere lasi, badina idia be hekokoroku bona dika taudia.

¹³Momokani, Dirava ese anina lasi taitai, be ia kamonai henia lasi, Siahu Ibounai Dirava ese idia ia laloa lasi.

¹⁴Iobu e, oi gwau oi ese Dirava oi itaia diba lasi. To do oi naria noho mai laloa goada, badina oiemu hereva gauna, be iena vairanai ia noho, do ia laloa.

¹⁵Oi laloa Dirava ese, dika ena davana ia henia noho lasi, a? Ia ese kara dika ia laloa momo lasi, a?

¹⁶Iobu e, do oi hereva noho, be anina lasi. Hereva momo oi gwauraia noho kava, edia anina oi diba lasi.”