Read Buka Helaga (Hiri Motu) 1993 IOBU 38 Bible Online

IOBU 38 - Buka Helaga (Hiri Motu) 1993 bible

IOBU 38

¹Vadaeni Lohiabada ese Iobu dekenai ia haere, lai guba dekena amo, ia gwau,

²“Oi be daika, oi ese anina lasi hereva dekena amo, egu aonega dekenai dibura oi atoa, a?

³Oi ese harihari tau korikori bamona, do oi gini maoromaoro, bona oi dekenai lau nanadaia gaudia do oi haere henia.

⁴“Lau ese tanobada lau karaia neganai oi be edeseni? Bema oi diba, lau dekenai do oi hamaoroa.

⁵Daika ese tanobada ena bada ia gwauraia? Ena lata bona ena lababa be daika ese ia tohoa? Oi be oi haere diba?

⁶Tanobada ena badina nadi, be dahaka ese ia dogoatao diba? Daika ese tanobada ena kona nadi ia atoa?

⁷Unai dina ena daba neganai, daba ena hisiu be idia ane abia hebou, bona guba ena aneru ibounai, be mai moale danu idia boiboi.

⁸“Davara be tanobada ena bogana dekena amo, ia heau mai murimurinai neganai, daika ese iena iduaradia ia koua, vadaeni davara be iena hetoa gabu lalonai ia noho?

⁹Unai neganai lau ese ori lau karaia, davara ena dabua bamona, bona dibura badana lau havaraia, iena kouti bamona.

¹⁰Davara do ia hanaia lasi ena hetoa gabudia, be lau gwauraia vadaeni, bona iena maguna bona iena iduara lau karaia.

¹¹Lau ese davara lau hamaoroa, lau gwau, ‘Oi mai ela bona inai gabu dekenai, to do oi hanaia lasi. Iniseni oiemu hurehure badadia do idia doko!’

¹²“Iobu e, oi ese nega ta dina oi oda henia, do ia toreisi?

¹³Oi ese nega ta daba rere oi oda henia, ia ese tanobada do ia dogoatao, bona kara dika taudia edia hunia gabudia dekena amo, do ia kokidia haraga.

¹⁴Dina ena diari ese ororo bona koura ia hedinaraia, dabua edia lokua gabudia bamona, bona toa karaia gauna ese raro ia moia tao bamona.

¹⁵Dina ena diari ese, kara dika taudia edia matana ia hadikaia, iena diaridiari ese edia dagedage karadia ia koua.

¹⁶“Oi ese nega ta, davara ena lohilohi daekau gabudia oi vareai, a? O davara ena dobu gabudia dekenai oi raka vadaeni, a?

¹⁷Mase gabuna ena iduara, be oi dekenai nega ta idia hedinaraia, a? O dibura masemase ikoukou, be oi ese oi itaia vadaeni, a?

¹⁸Tanobada ena dokona gabudia ibounai be oi diba, a? Bema oi diba, lau dekenai oi haere.

¹⁹“Oi be diari ia mai gabuna oi diba, a? O dibura ia noho gabuna oi diba, a?

²⁰Diari bona dibura, be edia gabudia dekenai oi ese oi abia lao diba, a? Edia gabu lao dalana oi diba, a?

²¹Sedira oi diba, badina oi be buruka herea, oiemu mauri lagani be momo herea vadaeni.

²²“Oi ese nega ta, sinou lau haboua gabudia dekenai oi vareai, o aisi nadi bamona medu, lau ese lau haboua gabudia oi itaia, a?

²³Unai gaudia be lau ese lau abia hegaegae, do lau gaukaralaia, dika do ia vara neganai, o egu tuari do idia durua totona.

²⁴Kevaru ia toreisi gabuna, be nega ta oi vadivadi henia, a? O oi diba laurabada, be edena gabu dekena amo tanobada dekenai ia toa, a?

²⁵Daika ese medu ena ranu, ena heau lao dadaira ia geia? Bona guba boiboi bada ena dala, be daika ese ia karaia?

²⁶Taunimanima idia noho lasi tano dekenai, be daika ese medu ia hadihoa?

²⁷Daika ese tano kaukau, nadi kavakava gabuna dekenai ranu ia henia, vadaeni rei ia tubu?

²⁸Medu o paripari be mai edia tamana, a?

²⁹Aisi, bona paripari ena aisi, be mai edia sinana, a?

³⁰Ranu be do idia auka, nadi bamona, bona davara ena kopina be aisi hegeregerena ia lao.

³¹Hisiu ladana Kima be oi guia diba? O hisiu ladana Kesili be oi ese oi ruhaia diba?

³²Hisiu edia ladana Masaroto, be oi hakaua diba, ta ta edia nega, edia nega dekenai? O hisiu ladana Asa, mai ena natuna danu, be oi ese oi siaia lao diba, a?

³³Guba ena taravatudia be oi diba, a? Unai taravatudia, be tanobada dekenai oi gaukaralaia diba, a?

³⁴“Oiemu gadona oi habadaia diba, ori dekenai do oi boiboi, ranu momo ese oi dekenai do ia moru totona, a?

³⁵Oi ese kevaru ena lahi oi siaia lao diba, a? Vadaeni oi dekenai do idia mai, do idia gwau, ‘Ai mai inai, oiemu hesiai gaukara totona.’

³⁶Daika ese taunimanima edia kudouna dekenai, aonega ia henia? Daika ese taunimanima edia lalona dekenai, diba bada ia henia?

³⁷Daika be mai ena aonega, vadaeni ori ibounai do ia duahia diba, a? Bona guba ena ranu be daika ese ia habubua diho?

³⁸Unai bamona medu ese kahu ia aukaia, kopukopu be nadi bamona idia lao.

³⁹“Oi ese laiona ena aniani abia totona, nega ta oi labana, a? Laiona edia natudia be vamu dekenai oi ubua diba, a?

⁴⁰Unai bamona do oi karaia, edia nadi matuna dekenai idia hunia noho, o ava murinai idia naria noho neganai, a?

⁴¹Galo manudia be daika ese ia ubua noho, idia be mai hitolo danu idia roho loaloa neganai, bona edia natudia ese Dirava dekenai idia boiboi, aniani do lau henidia totona?