Read Buka Helaga (Hiri Motu) 1993 IOBU 40 Bible Online

IOBU 40 - Buka Helaga (Hiri Motu) 1993 bible

IOBU 40

¹Lohiabada ese Iobu dekenai ma ia hereva, ia gwau,

²“Iobu e, oi ese Siahu Ibounai Diravana dekenai oi maumau, bona oi ese lau do oi hamaoromaoroa diba, a? Namona be Dirava danu ia hepapahuahu tauna ese lau dekenai do ia haere!”

³Vadaeni Iobu ese Lohiabada dekenai ia haere, ia gwau,

⁴“Lau be namo lasi momokani, edena bamona oi dekenai do lau haere? Lau ese hereva ma ta do lau gwauraia lasi be namo.

⁵Hereva sisina bada lau gwauraia vadaeni, lau ura lasi ma lau habadaia.”

⁶Vadaeni Lohiabada ese Iobu dekenai ma ia hereva, lai bada dekena amo, ia gwau,

⁷“Oi ese harihari tau korikori bamona, do oi gini maoromaoro, bona oi dekenai lau nanadaia gaudia do oi haere henia.

⁸Oi ura lau dekenai kerere, bona maoromaoro lasi do oi gwauraia, oi sibona be maoromaoro do oi gwauraia totona, a?

⁹Oiemu goada be lauegu goada hegeregerena, a? Oiemu gadona oi habadaia diba, lauegu gadona hegeregerena, a?

¹⁰Bema inai be momokani, oi sibona do oi toreisi, mai oiemu hemataurai bona hekokoroku, bona oiemu hairai, bona king dagi ena toana do oi hedinaraia.

¹¹Hekokoroku taudia ibounai, be mai oiemu badu danu do oi itaia, oiemu siahu do oi hedinaraia, bona idia do oi hahemaraia.

¹²Oibe, idia do oi itaia noho, do oi hamanaudia. Kara dika taudia be edia gini gabuna dekenai, oi ese do oi moidia diho momokani.

¹³Ibounai be tano lalonai do oi guridia, mase taudia edia gabu dekenai do oi guidia.

¹⁴Unai neganai lau ese oi do lau hanamoa, do lau gwau, ‘Oi sibona oiemu goada dekenai oi kwalimu vadaeni.’

¹⁵“Dagedage gauna ladana Behemoto mani oi itaia. Lau ese ia lau karaia, oi lau karaia hegeregerena. Ia be rei ia ania noho, boromakau bamona,

¹⁶to iena tauanina be goada herea momokani. Iena varovaro be mai edia siahu bada herea,

¹⁷bona iena iuna be ia haginia neganai, ia be sida auna bamona, bona iena mamuna edia varovaro, be mai edia goada bada herea.

¹⁸Iena turiana be auri laboralabora bamona, bona iena aena ruaosi be auri korikori bamona.

¹⁹Lau Dirava ese lau karaia gaudia ibounai, edia huanai ia sibona be herea! Lau sibona mo lau halusia diba.

²⁰Ia ese ia ania rei, be ororo dekenai ia tubu noho, dagedage gaudia edia gadara gabuna dekenai.

²¹Au ginigini ena henunai ia hekure, siriho edia lalonai, bona gohu dekenai.

²²Au ginigini ese ia hakerukerua noho, bona sinavai badinai audia ese idia hagegea noho.

²³Oi itaia, abata bada ia vara neganai, Behemoto be ia gari lasi momokani, Ioridane Sinavai ese Behemoto ena uduna do ia hahonua, to ia be ia gari lasi momokani.

²⁴Oi ese kimai dekena amo oi veria diba, a? O iena udu baubauna, be tarapu dekenai oi dogoatao diba, a?”