Read Buka Helaga (Hiri Motu) 1993 IOBU 41 Bible Online

IOBU 41 - Buka Helaga (Hiri Motu) 1993 bible

IOBU 41

¹Lohiabada ma Iobu dekenai ia hereva, ia gwau, “Dagedage gauna ladana Leviatano, be kimai dekena amo oi veria diba, a? O iena malana be varo dekenai oi guia diba, a?

²Iena udubaubauna be varo dekenai oi dogoatao diba? O kimai dekenai iena aukina oi veria diba?

³Ia ese oi dekenai do ia noinoi, o hereva manada dekenai, oiemu bogahisihisi do ia tahua, a?

⁴Ia ese oi dekenai do ia gwauhamata, do ia gwau, ‘Lau ese oiemu hesiai gaukara, be do lau karaia hanaihanai, a?’

⁵Oi ese do oi gadaralaia diba, manu bamona? O do oi guia, bona hamanadaia, oiemu kekeni edia gadara gauna, a?

⁶Haoda taudia be Leviatano hoia totona, iena davana do idia hepapahuahu, a? O do idia haria, hoihoi taudia do idia hoia totona, a?

⁷Diba momo dekena amo, iena kopina dekenai oi pidia diba, a? O iena kwarana be karaudi dekena amo, oi gwadaia diba, a?

⁸Bema oiemu imana dekenai oi dogoatao neganai, ia be oi dekenai do ia heatu henia, mai dagedage bada. Vadaeni oi ese do oi karaia lou lasi momokani.

⁹Tau ta, bema Leviatano ia itaia neganai, iena goada be ia ore, bona gari dainai tano dekenai do ia moru.

¹⁰Tau ta ese Leviatano do ia hanogaia lasi, do ia dagedage bada garina, bona tau ta, be Leviatano ena vairanai do ia gini diba lasi.

¹¹Daika ese do ia heatu henia? Tanobada tauna ta ese ia karaia diba lasi.

¹²“Lau ura Leviatano ena aena do lau herevalaia, iena tauanina ena goada lau ura gwauraia namonamo.

¹³Daika ese iena kopina ia darea parara diba? Daika ese iena kopina ia gwadaia diba? Ia be auri bamona, ani?

¹⁴Daika ese iena uduna ia kehoa diba, badina iena isena be mai gari bada herea, ani?

¹⁵Iena doruna be kesi momo bamona. Idia be hakapua hebou, hakapua hebou, bona auka, nadi bamona.

¹⁶Inai kesi ta ta ibounai be hekahi momokani, bona hodahoda be, ta ta edia huanai ia vareai diba lasi.

¹⁷Idia noho hebou, idia kamokamo hebou, bona idia parara diba lasi.

¹⁸Leviatano ia asimana neganai, diari ia hedinaraia kimore bamona, bona iena matana idia hururu, dina ia daekau neganai bamona.

¹⁹Iena uduna dekena amo lahi ia mai, kimore danu idia roho daekau.

²⁰Iena udubaubauna dekena amo, kwalahu ia daekau noho, uro ena henunai siriho idia gabua kwalahu bamona.

²¹Leviatano ia hahodi neganai, au rakuraku ia gabua ore, bona lahi hururu, be iena uduna dekena amo idia hedinarai noho.

²²Iena aiona be mai ena goada. Gari bada be iena vairana dekenai.

²³Iena kopina ena latanai be manoka gabuna ta lasi, ia be auka momokani, auri bamona.

²⁴Iena kudouna be ia auka, nadi bamona, uiti idia moia nadi ia auka bamona.

²⁵Ia toreisi neganai goada taudia idia gari. Iena regena idia kamonai neganai, gari dainai idia manoka.

²⁶Tuari kaia dekenai Leviatano idia gwadaia, be anina lasi. Io bona diba bona karaudi danu be anina lasi.

²⁷Auri be rei kaukau ia dekenai, bona auri laboralabora be au, ia bodaga dainai ia manoka bamona.

²⁸Diba ese Leviatano idia hagaria lasi, unai dainai ia heau lasi. Nadi do idia negea varo dekenai, to unai nadi be, Leviatano ese uiti ena momoru ia halaoa noho.

²⁹Kareva be uiti momoru bamona ia dekenai, bona ia dekenai io idia negea neganai ia kiri bada.

³⁰Iena bogana ena kopina, be uro ia makohia isedia bamona. Idia ese kopukopu idia kwadia, uiti kwadia auna bamona.

³¹Davara be Leviatano ese ia hamarerea noho, ranu ia boila bamona, bona davara be, uro lalonai oela ia lohilohi ena toana bamona.

³²Davara lalonai ia heau neganai, hurehure be iena murinai dala ena toana idia karaia, davara be gwaragwara bamona ia lao.

³³Tanobada dekenai be ia hegeregerena ta lasi, ia be gari diba lasi gauna.

³⁴Mai edia hekokoruku dagedage gaudia ibounai, be ia ese ia hereadia, ia be hekokoroku gaudia ibounai edia king.”