Read Buka Helaga (Hiri Motu) 1993 IOBU 7 Bible Online

IOBU 7 - Buka Helaga (Hiri Motu) 1993 bible

IOBU 7

¹“Taunimanima edia hekwarahi tanobada dekenai be auka, ani? Edia noho be, davana totona idia gaukara auka taudia edia noho bamona.

²Edia noho danu be hesiai mai guia danu tauna bamona, adorahi ena keruma totona ia tai bamona, bona gaukara tauna ese, iena gaukara davana ia tahua noho bamona.

³Inai bamona danu, hua momo lalonai egu noho be anina lasi, hanuaboi momo danu egu lalona ia hisihisi bada noho.

⁴Lau hekure neganai lau gwau, ‘Edena negai do lau toreisi?’ To hanuaboi be ia daudau dainai, mai mareremarere lau hekure noho ela bona dabai, mahuta lasi.

⁵Egu tauanina be gaigai maragidia dekenai ia honu, bona egu kopina be kipara ese idia koua. Rara kurokuro be egu toto dekena amo ia diho noho.

⁶Egu dina ta ta be idia ore haraga, dabua hatua tauna ena nila ena haraga bamona, bona egu kopina do ia namo lou totona, be unai bamona lau laloa diba lasi.”

⁷Ma Iobu ia hereva, ia gwau, “Dirava e, do oi laloatao, egu mauri be hahodi tamona sibona. Egu moale negadia be idia ore vadaeni.

⁸Lau ia itaia noho tauna ese, lau do ia itaia lou lasi. Harihari umui ese lau umui itaia noho, to nega tamona do lau boio ore.

⁹Ori ta ia veve lao, bona ia ore vadaeni. Unai bamona danu, Mase Gabuna dekenai ia diho tauna be ia daekau lou lasi.

¹⁰Iena ruma dekenai do ia giroa lou lasi. Bona iena gabu dekenai noho taudia ese, ia do idia laloaboio.

¹¹“Unai dainai egu hereva do lau hadokoa lasi. Egu lalona ia hisihisi noho dainai, do lau hereva noho. Egu lauma ena mamina ia dika dainai do lau maumau.

¹²Umui laloa lau be davara ena dagedage gauna ta, a? Unai dainai lau umui itaia namonamo noho, a?

¹³Lau be egu mahuta patana dekenai lau hekure, laga-ani abia totona, bona unuseni egu hisihisi do ia namo totona.

¹⁴To umui ese nihi dekena amo lau umui hagaria noho, bona mata hanai dekena amo danu lau umui hagaria bada noho.

¹⁵Unai dainai lau ura egu aiona idia gigia, vadaeni do lau mase, to inai egu tauanina do ia mauri noho lau ura lasi.

¹⁶Egu mauri lau ura lasi momokani, bona mauri hanaihanai lau ura lasi. Lau dekenai do umui noho lasi, badina be egu mauri be anina lasi.

¹⁷“Dirava e, taunimanima be dahaka, oi ese oi abia isi, bona iena ladana oi habadaia? Bona iena kara dekenai, badina dahaka oi laloa bada noho?

¹⁸Oi ese daba daba ibounai taunimanima oi itaia noho? Bona nega ibounai oi tohoa lou, tohoa lou noho?

¹⁹Lau dekenai do oi itaia noho ela bona edena negai? Lau do oi rakatania nega sisina, ela bona egu kanudi lau hadonoa, a?

²⁰Taunimanima oi itaia noho Diravana e! Bema kara dika lau karaia, inai kara dika ese edena bamona oi ia hadikaia? Badina dahaka oi ese oiemu diba oi pidia noho lau dekenai? Lau be maduna metau herea oi dekenai, a?

²¹Badina dahaka egu kara dika oi gwauatao lasi? Badina dahaka egu kara kerere do oi kokia lao lasi? Badina lau be kahirakahira guria gabuna, tano lalonai do lau hekure, bona lau do oi tahua, to lau do oi davaria lasi.”