Read Buka Helaga (Hiri Motu) 1993 IOBU 9 Bible Online

IOBU 9 - Buka Helaga (Hiri Motu) 1993 bible

IOBU 9

¹Vadaeni Iobu ia haere, ia gwau,

²“Momokani, emui hereva be maoro. To tau ta be edena bamona do ia maoromaoro diba, Dirava ena vairana dekenai? Edena bamona tau ta ese, Dirava dekenai do ia hepapahuahu henia diba?

³Bema Dirava ese, tau ta nega 1000 henanadai ia nanadaia neganai, unai tau ese unai 1000 lalonai, nega ta do ia haere henia lasi.

⁴Badina Dirava ena aonega be bada herea, iena siahu danu be bada momokani. Daika ese iena lalona ia ha-aukaia Dirava dekenai, vadaeni do ia kwalimu? Ta lasi momokani.

⁵Dirava ese ororo ia kokia lao, idia laga-ani diba lasi. Dirava ese iena badu dekena amo ia hadikadia ore.

⁶Dirava ese tanobada ia hamarerea bada noho, bona tanobada ena badina nadidia idia heudeheude noho.

⁷Dirava ese dina dekenai ia oda henia, vadaeni dina do ia daekau lasi, bona ia ese hisiu danu edia diari ia koua diba.

⁸Dirava sibona ese guba ia karaia, ta ia durua lasi, bona Dirava ese davara ena hurehure edia latanai, ia raka lao noho.

⁹Dirava ese hisiu ladana Asa bona Kesili bona Kima, be ia karaia, bona diho kahana dekenai hisiu haida ma ia atoa.

¹⁰Dirava ese ma kara badadia ia karaia noho, ita diba lasi karadia, bona iena hoa karadia be momo herea, duahia diba lasi.

¹¹Dirava ese lau ia raka hanaia noho, to lau ese ia lau itaia lasi. Lauegu vairana dekenai ia raka lao noho, to lau diba lasi.

¹²Dirava ese iena ura gauna ia abia noho, bona ta ese ia koua diba lasi. Daika ese do ia nanadaia, do ia gwau, ‘Dakaka oi karaia noho?’

¹³Dirava ese iena badu ia koua lasi. Unai huala badana Rahaba,[1] ena durua taudia, hekokoroku taudia, be Dirava ese idia ia hadikaia ore momokani.

¹⁴“Edena bamona Dirava dekenai do lau haere henia? Iena kota dekenai lau hereva neganai, lau gwauraia gauna be edena bamona do lau davaria?

¹⁵Momokani, lau gwau lau be kerere lasi, to unai danu be lau gari noho, vadaeni Dirava dekenai lau haere henia diba lasi. Egu dala tamona be lau ese egu Kota Biaguna, Dirava, ena bogahisihisi totona do lau noia.

¹⁶Bona bema ia dekenai lau boiboi, bona lau dekenai ia haere neganai, lau laloa ia ese lau dekenai do ia kamonai lasi.

¹⁷Badina be ia ese lai bada dekena amo, lau ia hadikaia noho, bona bero momo lau dekenai ia henia, to mai ena badina ta lasi.

¹⁸Ia ese egu hahodi dalana ia koua, bona egu lalona be mamina dikadia, dekena amo ia hahonua noho.

¹⁹Dirava ena goada ese ibounai edia goada ia hanaia, bona iena maoromaoro be herea, daika ese ia kota henia diba?

²⁰Lau be lau maoro, to egu uduna ia gwau lau be kerere. Lau be lau kerere lasi, to Dirava ese lau ia gwauraia kerere.

²¹Lau be lau kerere lasi, to hari lau laloa lasi, badina egu mauri ena namo lau laloa lou lasi.

²²Unai be gau ta lasi, badina be Dirava ese kerere lasi taudia, bona kara dika taudia danu do ia hadikaia ore hebou.

²³Bema kerere lasi tauna ia mase haraga neganai, Dirava ia kiri noho.

²⁴Dirava ese inai tanobada, be kara dika taudia edia imadia dekenai ia atoa. Ia ese kota biagudia ibounai edia matadia ia koua. Bema Dirava ese unai bamona ia karaia lasi, daika ese ia karaia?

²⁵“Egu mauri dinadia idia lao haraga noho, heau helulu tauna ia heau haraga bamona. Egu dina idia heau lao noho, idia ta ese lau idia hamoalea lasi.

²⁶Egu mauri dinadia be, vanagi mai heauna bamona idia lao haraga noho, ugava manu ese, iena vamu abia totona ia diho haraga noho bamona.

²⁷Lau ura inai bamona lau hereva: ‘Egu maumau do lau laloaboio, egu lalohisihisi do lau hadokoa, bona do lau moale.’

²⁸To egu hisihisi ibounai dekenai lau gari, badina lau diba Dirava ese, lau do ia gwauraia maoro lasi.

²⁹Dirava ese lau ia gwauraia kerere dainai, lau be do lau hekwarahi kava ena anina be dahaka?

³⁰Sopu ese egu kara dika ia huria ore diba lasi.

³¹To Dirava ese, guri mirona lalonai lau do ia negea diho. Unai neganai egu dabua danu ese, lau dekenai do idia hemarai.

³²“Bema Dirava be taunimanima, lau ese ia dekenai do lau haere diba, bona ai ruaosi be kota gabuna do ai gini hebou, emai hepapahuahu hamaoromaoroa totona.

³³To tau ta ese, aiemai padana dekenai do ia gini diba lasi. Kota biaguna ta be lasi, Dirava bona lau aiemai hepapahuahu tahua totona.

³⁴Dirava e, mani emu kara, oiemu kwadia auna lau dekena amo do oi abia siri. Oiemu matakani ena gari bada, be lau dekena amo do oi abia siri.

³⁵Unai neganai lau ese oi dekenai do lau hereva henia, mai gari lasi danu, badina lau diba, lau ese davana dika kererena ta lau karaia lasi.”