Read Buka Helaga (Hiri Motu) 1993 SALAMO 10 Bible Online

SALAMO 10 - Buka Helaga (Hiri Motu) 1993 bible

SALAMO 10

¹Lohiabada e, badina dahaka lau dekena amo, oi be daudau dekenai oi gini noho? Badina dahaka dika negadia lalonai, oi be hunia dekenai oi noho?

²Kara dika taudia be mai hekokoroku danu, idia ese ogogami taudia, idia dagedage henia noho. Unai dika taudia sibodia edia laloa dika, ese idia do ia hadikaia be namo.

³Tau dikana ese, iena ura dikadia dekenai ia hekokoroku noho. Ma gau ia ura henia momo tauna ese, Lohiabada ia negea, ma Lohiabada dekenai ia hereva dika noho danu.

⁴Tau dikana ese Lohiabada ia tahua lasi, bona iena hekokoroku dainai, ia laloa Dirava be lasi.

⁵Kara dika tauna be, iena kara ibounai dekenai ia kwalimu noho, Lohiabada ena kota henia kara be ataiai herea, unai dainai ia laloa lasi Dirava dekenai. Tau dikana dekenai idia tuari henia taudia, be ia ese idia ia kirikirilaia noho.

⁶Sibona dekenai inai bamona ia laloa: “Gau ta ese lau do ia hamarerea lasi. Lau be nega ta dika do lau davaria lasi.”

⁷Kara dika tauna ia hereva negadia ibounai, ia ese taunimanima ia hadikaia, ia koikoi, bona hereva dagedage ia gwauraia noho.

⁸Hanua edia lalonai ia hunia noho, kerere lasi taudia do ia alaia mase totona. Ia ese manoka taudia ia tahua noho, do ia hadikadia totona.

⁹Iena hunia gabuna lalonai ia naria noho, laiona ese iena guri lalonai, boroma alaia totona ia naria bamona. Ogogami taudia hadikaia totona ia naria noho. Iena tarapu lalonai ia abidia noho, bona gabu ta dekenai ia veridia lao noho.

¹⁰Ia ese ia daredia vadaeni taudia, be idia dika vadaeni. Iena goada ena siahu ese, idia ia hadikaia vadaeni.

¹¹Kara dika tauna ese sibona dekenai ia gwau: “Dirava ese egu kara ia laloa lasi, Dirava ese iena matana ia hakapua vadaeni, bona ia ese lau do ia itaia lasi.”

¹²Lohiabada e, unai kara dika taudia, edia davana do oi henia. Idia hisihisi henidia noho taudia, be mani do oi durua.

¹³Kara dika tauna be edena bamona, ia ese Dirava do oi negea diba? Edena bamona do ia gwau, “Dirava ese lau do ia panisia lasi?”

¹⁴To Lohiabada e, oi ese gau ibounai oi itaia noho, oi ese hekwarahi bona hisihisi oi itaia noho. Bona oi ese taunimanima durua totona, oi gini hegaegae noho. Manoka taudia ese, oi dekenai idia abidadama noho, badina be oi ese gau lasi taudia, be nega ibounai oi durua momokani vadaeni.

¹⁵Kara dika bona kerere taudia, edia siahu mani do oi hamakohia. Edia kerere dainai, edia davana do oi henia, ela bona do idia karaia lou lasi.

¹⁶Lohiabada be do ia King ela bona hanaihanai. Dirava idaudia dekenai idia tomadiho taudia, be Dirava ena tano dekena amo do idia boio.

¹⁷Lohiabada e, oi ese manau taudia edia noinoi, be do oi kamonai henia, ani? Oi ese edia lalona do oi hagoadaia, bona edia taitai do oi kamonai.

¹⁸Edia tamadia sinadia be lasi natudia, bona idia hisihisi noho taudia, edia tai mani do oi kamonai. Edia kota do oi durua, mai oiemu laloa maoromaoro bona momokani danu. Unai neganai tanobada tauna ta ese, idia hagaria karana ta, be do ia karaia lou lasi.