Read Buka Helaga (Hiri Motu) 1993 SALAMO 106 Bible Online

SALAMO 106 - Buka Helaga (Hiri Motu) 1993 bible

SALAMO 106

¹Lohiabada do umui hanamoa! Lohiabada do umui tanikiu henia, badina ia be namo. Iena lalokau bona bogahisihisi do idia noho ela bona hanaihanai.

²Daika ese Lohiabada ena siahu karadia ia herevalaia diba? Daika ese Lohiabada do ia hanamoa haorea momokani diba?

³Mai edia laloa maoromaoro bona edia momokani taudia be namo. Nega ibounai kara maoromaoro idia karaia taudia danu be namo.

⁴Lohiabada e, oiemu orea taudia do oi hanamoa neganai, lau danu do oi laloa. Oiemu bese taudia oi hamauria neganai, lau danu do oi durua.

⁵Unai neganai lau ese, oiemu abia hidi taudia edia noho namo do lau itaia, bona edia moale be do lau moalelaia. Ai be do ai moale, badina ai be oiemu bese korikori taudia.

⁶Ai ese ai kara dika, aiemai tamadia idia kara dika bamona. Ai ese ai kara kerere, bona dika ai karaia vadaeni.

⁷Aiemai sene taudia be Aigupito dekenai idia noho neganai, idia ese oiemu hoa karadia idia laloa lasi. Oiemu lalokau nega momo oi hedinaraia, to idia laloatao lasi. Bona idia ese Siahu Ibounai Dirava dekenai idia dagedage, Davara Kakakaka dekenai.

⁸To iena gwauhamata dainai, ia ese idia ia hamauria, iena siahu badana do ia hedinaraia totona.

⁹Davara Kakakaka be ia ese ia gwau henia, vadaeni ia kaukau lao. Ia ese dobu gabuna dekena amo iena bese ia hakaudia, tano kaukau dekena amo do ia hakaudia hegeregerena.

¹⁰Unai kara dekena amo Dirava ese Israela taudia ia hamauria, idia badu henidia taudia dekena amo. Idia hadikaia ore gwauraia taudia dekena amo, Dirava ese ia hakaudia mauri.

¹¹Davara ese Israela idia badu henia taudia ia koua momokani, bona idia ta ia heau mauri lasi.

¹²Unai neganai, Israela taudia ese Lohiabada ena gwauhamata idia hamomokania, bona ia hanamoa totona ane idia abia.

¹³To idia ese Lohiabada ena kara idia laloaboio haraga. Iena sisiba kamonai totona idia naria lasi.

¹⁴Tano kaukau dekenai Israela taudia idia ura kava, ura kava noho, bona unuseni idia ese Dirava idia tohoa.

¹⁵Vadaeni ia ese edia ura gauna ia henidia, to gorere dikana ia siaia, idia edia tauanidia ia hadikaia.

¹⁶Idia edia kamepa dekenai idia ese Mose bona Arona, Lohiabada ena helaga taudia idia mama henia.

¹⁷Unai neganai tano ese iena uduna ia kehoa, guri badana ia vara, bona Datana be unai guri lalonai ia moru, tano ese ia koua, ia mase. Inai guri ese Abirama ena orea taudia danu ia hadonoa, ibounai be tano ese ia koudia, idia mase.

¹⁸Lahi danu be edia orea taudia edia latanai ia diho, bona unai tau dikadia ia gabudia ore.

¹⁹Sinai Ororo dekenai Israela taudia ese, boromakau ena natuna ena laulauna idia karaia. Idia ese unai golo kaivakuku dekenai idia tomadiho henia.

²⁰Idia ese Dirava ena hairaina idia rakatania, bona boromakau tau, rei ia ania gauna ena laulau, be Dirava ena gabu dekenai idia atoa.

²¹Idia ese Dirava, edia hamauria Diravana, Aigupito dekenai kara badadia ia karaia Diravana idia laloaboio.

²²Ia ese Hamo ena tano dekenai hoa karadia ia karaia, bona Davara Kakakaka ena isena dekenai, gari bada karadia ia karaia, ani?

²³Vadaeni Dirava ia gwau iena bese taudia do ia hadikaia ore, to ia ese ia abia hidi tauna Mose, be unai bese taudia bona Dirava edia huanai ia gini. Mose ese Dirava ena badu ia hakerua, ia ese iena bese taudia do ia alaia ore garina.

²⁴Unai murinai idia ese, Dirava ia herevalaia tano namona idia ura lasi. Idia ese Dirava ena gwauhamata idia abidadama henia lasi.

²⁵Edia palai rumadia dekenai idia hereva badubadu, bona Lohiabada ena hereva idia kamonai henia lasi.

²⁶Unai dainai ia ese sisiba metauna idia dekenai ia henia. Ia gwau tano kaukau dekenai ia ese idia do ia hamasea,

²⁷bona ia ese edia natudia, be bese idauidau edia huanai do ia luludia lao, vadaeni idau bese taudia edia tanodia dekenai do idia mase.

²⁸Bona Peoro dekenai, Dirava ena bese taudia ese Bala dirava idia tomadiho henia, unai mauri lasi dirava dekenai idia henia boubou vamu idia ania.

²⁹Inai kara dekena amo idia ese Lohiabada idia habadua, vadaeni hanaia gorere dikana be idia dekenai ia vara.

³⁰To Pineha ese ia toreisi, bona kerere taudia edia dika davana ia henia, vadaeni unai gorere dikana be Dirava ese ia hadokoa.

³¹Unai negana ia mai bona hari, Pineha ena kara ai gwauraia be maoromaoro. Bona gabeai do idia vara taunimanima danu ese, Pineha ena kara maoromaoro do idia herevalaia noho, ela bona nega ibounai.

³²Meriba ranu gabudia dekenai, Israela taudia ese Lohiabada idia habadua, bona Mose ese hisihisi ia davaria idia dainai.

³³Badina be idia ese Mose ena lauma idia habadua, bona unai dainai ia ese hereva maoromaoro ia gwauraia lasi.

³⁴Lohiabada ese Israela taudia ia oda henidia, idau bese taudia do idia alaia mase, to idia ese idia karaia lasi.

³⁵Bona idia ese unai idau bese taudia danu idia headava hanai, vadaeni unai idau bese taudia edia mauri dala dikadia, be Israela taudia idia abia dae.

³⁶Ma Dirava ena bese taudia ese, unai taudia edia kaivakuku idia tomadiho henia, bona inai kara ese Dirava ia habadua, vadaeni ia hadikadia.

³⁷Idia ese edia natudia tau bona hahine, be boubou gaudia totona lauma dikadia dekenai idia henia.

³⁸Idia ese Kanana taudia edia kaivakuku dekenai boubou idia henia. Unai bamona idia karaia neganai, edia natudia tau bona natudia hahine idia alaia mase, edia boubou gaudia totona. Kerere lasi taudia edia rarana idia habubua. Inai rara ese tano ibounai ia hadikaia.

³⁹Inai karadia dekena amo Israela taudia be idia miro lao, bona idia ese edia abidadama Dirava dekenai idia makohia.

⁴⁰Unai dainai Lohiabada ese, iena bese taudia ia badu henidia momokani. Ia ese idia ia ura henia lasi.

⁴¹Ia ese bese idauidau taudia edia siahu henunai ia atodia. Vadaeni Israela dekenai idia tuari henia taudia ese, Israela taudia idia biagua.

⁴²Unai idau bese taudia ese Israela taudia idia dagedage henia, bona edia siahu henunai Israela taudia idia noho momokani, mai guia danu.

⁴³Nega momo Lohiabada ese, iena bese taudia ia durua bona ia hamauria, to idia ese ia dekenai idia kamonai henia lasi, bona edia kara dika ese idia ia hadikaia.

⁴⁴To Lohiabada ese edia taitai ia kamonai neganai, ia ese edia hisihisi ia laloa,

⁴⁵bona idia dekenai ia karaia gwauhamata taravatuna ia laloatao. Iena bogahisihisi bada herea dainai edia dika ia gwauatao.

⁴⁶Ia ese idia dagedage henidia taudia edia lalodia dekenai, bogahisihisi kara ia havaraia, vadaeni unai Israela taudia idia guia vadaeni taudia ese, Israela taudia dekenai idia bogahisihisi henia.

⁴⁷Lohiabada, aiemai Dirava e, mani ai do oi hamauria. Bese idauidau edia huanai dekena amo ai do oi haboua, vadaeni ai ese oiemu ladana helagana do ai hanamoa, mai tanikiu momokani danu.

⁴⁸Lohiabada, Israela ena Dirava, do umui hanamoa. Hari inai dina dekena amo ela bona hanaihanai, taunimanima ibounai be do idia gwau, “Amen.” Lohiabada do umui hanamoa!