Read Buka Helaga (Hiri Motu) 1993 SALAMO 112 Bible Online

SALAMO 112 - Buka Helaga (Hiri Motu) 1993 bible

SALAMO 112

¹Lohiabada do umui hanamoa. Lohiabada dekenai ia gari tauna be namo. Lohiabada ena taravatu ia moalelaia noho tauna danu be namo.

²Inai bamona tau namona ena natuna, be do idia goada edia tano lalonai. Iena bese taudia, gabeai do idia vara taudia, ese Dirava ena hanamoa do idia davaria.

³Iena famili taudia, be do mai edia moni bona kohu momo, bona iena kara maoromaoro, be do ia noho ela bona hanaihanai.

⁴Momokani dibura ia noho, to tau namona durua totona diari be ia diari noho, vadaeni ia be mai ena hariharibada, bona mai ena bogahisihisi, bona mai ena kara maoromaoro danu.

⁵Haida dekenai harihari gaudia ia henia, bona mai laloa namona danu haida dekenai ia heniatorehai. Iena gaukara be, mai ena maoromaoro danu ia karaia. Unai bamona tauna be do ia moale noho.

⁶Tau namona be nega ta do idia hamorua lasi. Taunimanima ese ia do idia laloatao hanaihanai.

⁷Dika bada ia vara ena sivarai ia kamonai neganai, unai tau be do ia gari lasi, badina ia ese Lohiabada dekenai ia abidadama henia goada noho.

⁸Ia be ia laloa hekwarahi lasi, bona ia gari lasi, badina ia diba momokani, ia idia hadikaia gwauraia taudia be, ia ese mai kwalimu danu edia moru do ia itaia.

⁹Mai edia gau lasi taudia dekenai, harihari gaudia ia henia vadaeni. Iena kara maoromaoro be do ia noho ela bona hanaihanai. Ia ese siahu bona goada do ia abia, bona taunimanima ese ia do idia matauraia.

¹⁰Kara dika taudia ese inai iena goada idia itaia noho, bona idia badu noho. Idia ese unai tau namona do idia badu henia, bona do idia boio momokani. Kara dika tauna ena ura gauna ena anina, be do ia vara lasi.