Read Buka Helaga (Hiri Motu) 1993 SALAMO 113 Bible Online

SALAMO 113 - Buka Helaga (Hiri Motu) 1993 bible

SALAMO 113

¹Lohiabada do umui hanamoa. Lohiabada ena hesiai taudia e, Lohiabada ena ladana do umui hanamoa.

²Lohiabada ena ladana do ita hanamoa noho, hari ela bona hanaihanai.

³Dina daekau kahana ela bona dina diho kahana dekenai, Lohiabada ena ladana do ita hanamoa be namo.

⁴Lohiabada be ataiai, bese ibounai be ia ese ia biagua noho. Iena hairaina be guba ena ataiai danu ia noho.

⁵Daika be Lohiabada iseda Dirava hegeregerena? Lohiabada be guba ena ataiai ia helai noho,

⁶to ia ese iena kwarana ia atoa diho, iena matana ia negea, guba bona tanobada ia itaia noho.

⁷Ia ese ogogami taudia, be tano ena kahu dekena amo ia abia isi noho, bona mai edia gau lasi taudia, be edia hisihisi dekena amo durua ia henidia noho.

⁸Lohiabada ese unai ogogami taudia ia abia isi noho, bona ia ese iena bese taudia edia gunalaia taudia dagi, be idia dekenai ia henia noho.

⁹Lohiabada ese natuna ia havaraia diba lasi hahine dekenai, noho gabuna ia henia noho. Ia ese unai hahine ia hanamoa noho, vadaeni memero bona kekeni momo ia havaraia, bona inai hahine be do ia moale bada noho. Lohiabada do umui hanamoa!