Read Buka Helaga (Hiri Motu) 1993 SALAMO 115 Bible Online

SALAMO 115 - Buka Helaga (Hiri Motu) 1993 bible

SALAMO 115

¹Lohiabada e, oi dekenai hairai bada ia noho, momokani, oi dekenai hairai bada ia noho, ai dekenai be lasi. Badina oiemu lalokau bona bogahisihisi be bada, bona oiemu gwauhamata badinaia kara be momokani.

²Badina dahaka idau bese taudia ese ai idia nanadaia, idia gwau, “Umui emui Dirava be edeseni ia noho?”

³Iseda Dirava be guba dekenai ia noho. Bema ia ura kara ta ia karaia, unai kara sibona do ia karaia.

⁴Unai idau bese taudia edia dirava, be siliva bona golo dekenai idia karaia, idia sibona edia imana dekenai idia karaia gaudia.

⁵Unai dirava koikoidia be mai edia uduna, to idia hereva diba lasi, bona mai edia matana, to idia itaia diba lasi.

⁶Idia be mai edia taiana, to idia kamonai diba lasi, bona mai edia udu baubauna, to bonana idia kamonai diba lasi.

⁷Idia be mai edia imana, to gau ta idia dogoatao diba lasi, bona mai edia aena, to idia raka diba lasi. Regerege ta idia karaia diba lasi.

⁸Unai bamona dirava koikoi idia karaia taudia be dika. Namona be idia karaia gaudia hegeregere do idia lao. Bona unai dirava koikoi idia abidadama henia taudia danu, namona be do idia dika, unai dirava koikoi hegeregere.

⁹Umui Israela taudia ibounai e, Lohiabada dekenai do umui abidadama henia. Ia ese umui ia durua noho, ma ia ese umui ia naria noho.

¹⁰Umui Dirava ena hahelagaia taudia e, Lohiabada do umui abidadama henia. Ia ese umui ia durua noho, ia ese umui ia naria noho.

¹¹Dirava garina umui gari taudia ibounai e, Lohiabada do umui abidadama henia. Ia ese umui ia durua noho, ia ese umui ia naria noho.

¹²Lohiabada ese nega ibounai ita ia laloa noho, bona ia ese ita do ia hanamoa. Ia ese Israela bese taudia, bona Dirava ena hahelagaia taudia do ia hanamoa.

¹³Lohiabada ese ia dekenai idia matauraia taudia ibounai, be do ia hanamoa, ladana bada bona ladana maragi taudia danu.

¹⁴Lau ura Lohiabada ese natudia momo umui dekenai do ia henia, bona emui natudia dekenai danu.

¹⁵Lohiabada ese guba bona tanobada ia karaia vadaeni. Lau ura ia ese umui do ia hanamoa.

¹⁶Guba be Lohiabada sibona ese ia biagua noho, to tanobada be Lohiabada ese taunimanima dekenai ia henia.

¹⁷Mase taudia be mase taudia edia gabu dekenai idia lao noho. Idia ese Lohiabada ena ladana idia hanamoa diba lasi.

¹⁸To ita be ita mauri noho dainai Lohiabada do ita tanikiu henia. Lohiabada ena ladana do ita hanamoa!