Read Buka Helaga (Hiri Motu) 1993 SALAMO 122 Bible Online

SALAMO 122 - Buka Helaga (Hiri Motu) 1993 bible

SALAMO 122

¹Lau dekenai idia hereva, idia gwau, “Lohiabada ena Ruma dekenai do ita lao.” Inai bamona idia hereva neganai, lau be mai moale bada danu.

²Vadaeni harihari ita be Ierusalema dekenai ita noho, Ierusalema ena magu ikoukou edia lalonai ita gini noho.

³Ierusalema be idia ese idia haginia lou, hanua badana. Iena toana be namo, badina be idia haginia namonamo vadaeni.

⁴Israela ena iduhu taudia ibounai be iniseni idia mai noho. Lohiabada do idia tanikiu henia totona, iena oda hereva gunana hegeregerena.

⁵Inai Ierusalema dekenai be Israela ena king taudia ese, edia bese taudia idia kota henia.

⁶Ierusalema ena maino totona do umui guriguri. Lau ura Ierusalema idia ura henia taudia, be do idia noho mai maino danu.

⁷Lau ura maino be Ierusalema ena magu lalonai do ia noho, bona lau ura Ierusalema ena kohoro lalonai, taunimanima ese mauri do idia davaria.

⁸Lau ese egu turana bona egu varavara lau laloa noho, bona Ierusalema dekenai lau hereva, lau gwau, “Maino be oiemu lalona dekenai do ia noho be namo.”

⁹Lau be Lohiabada, iseda Dirava ena Ruma lau laloa noho. Unai dainai Dirava lau noia noho, ia ese Ierusalema do ia hanamoa bada.