Read Buka Helaga (Hiri Motu) 1993 SALAMO 127 Bible Online

SALAMO 127 - Buka Helaga (Hiri Motu) 1993 bible

SALAMO 127

¹Bema Lohiabada ese ruma ia haginia lasi neganai, unai ruma idia haginia taudia idia hekwarahi kava noho. Bema Lohiabada ese hanua ta ia naria lasi neganai, hanua gimaia taudia ese idia gimaia kava.

²Ita ese daba maragi neganai ita toreisi, bona ita gaukara auka ela bona hanuaboi momokani, moni bona aniani gaudia do ita davaria totona. To inai bamona ita karaia kava, badina be Lohiabada ese ia lalokau henidia taudia dekenai, aniani bona kohu ia henidia, bona idia mahuta namonamo.

³Kamonai! Iseda natudia be Dirava ena harihari gauna ita dekenai. Dirava ese ita dekenai ia henidia, bona idia ese ita idia hanamoa noho.

⁴Eregabe tauna ena natuna taudia be, tuari tauna ena imana dekenai peva ena diba bamona.

⁵Bema tau ta be mai ena natuna momo, ia be do ia moale. Idia ese ia do idia durua, vadaeni do ia kwalimu, bona inai tau idia hadikaia gwauraia taudia idia kota henia neganai, ia be kota do ia lusi lasi.