Read Buka Helaga (Hiri Motu) 1993 SALAMO 128 Bible Online

SALAMO 128 - Buka Helaga (Hiri Motu) 1993 bible

SALAMO 128

¹Lohiabada dekenai idia gari noho taudia ibounai be namo, badina iena dala dekenai idia raka noho.

²Oiemu gaukara ena davana do oi davaria. Do oi moale, bona oiemu noho do ia namo.

³Oiemu ruma dekenai oiemu adavana, be vain auna mai ena huahua momo bamona. Oiemu natuna memero be olive au matamatadia bamona, oiemu aniani patana do idia helai hagegea noho.

⁴Momokani, tau ta bema Lohiabada ia kamonai henia neganai, ia ese hanamoa inai bamona do ia davaria.

⁵Siona dekena amo Lohiabada ese oi do ia hanamoa! Bona oiemu mauri dinadia ibounai lalonai, do oi itaia, Ierusalema ena noho be namo herea.

⁶Lau ura oiemu mauri dinadia be momo, vadaeni oiemu tubuna do oi itadia! Israela dekenai maino ia noho, be namo!