Read Buka Helaga (Hiri Motu) 1993 SALAMO 129 Bible Online

SALAMO 129 - Buka Helaga (Hiri Motu) 1993 bible

SALAMO 129

¹Israela e, ai dekenai oiemu sivarai do oi hadibaia, oi dekenai idia tuari henia taudia ese, nega daudau oi idia hadikaia vadaeni. Oi be mero neganai ia mai bona harihari, unai bamona idia karaia.

²Israela ese ia haere, ia gwau, “Io, lau be mero neganai ia mai bona hari, lau idia hadikaia gwauraia taudia ese, lau idia dagedage henia dikadika, to idia ese lau idia halusia lasi.

³Idia ese lau idia kwadia, kwadi gauna ese egu doruna ena kopina ia utua dobu. Egu doruna ena berona toana, be uma gabuna ena dadaira latadia momo bamona.

⁴To Lohiabada ena kara be maoromaoro. Ia ese hesiai mai guia danu edia seini, dekena amo lau ia kokia ruhaia vadaeni.”

⁵Lau ura Siona idia badu henia taudia ibounai, be tuari dekenai do idia lusi, bona mai hemarai danu do idia heau lou.

⁶Namona idia be ruma ena guhi dekenai idia tubu rei bamona, do idia huahua lasi neganai do idia kaukau.

⁷Rei utua tauna ese, unai rei be iena imana dekenai do ia abia lasi, bona rei guia tauna, be iena kemena dekenai do ia haboua lasi.

⁸Vadaeni raka hanaia taudia ese, inai taudia do idia herevalaia lasi, do idia gwau lasi, “Lohiabada ese umui do ia hanamoa! Lohiabada ena ladana dainai ai ese umui ai hanamoa noho!”