Read Buka Helaga (Hiri Motu) 1993 SALAMO 135 Bible Online

SALAMO 135 - Buka Helaga (Hiri Motu) 1993 bible

SALAMO 135

¹Dirava do umui hanamoa! Lohiabada ena gaukara umui karaia taudia e, Lohiabada ena ladana do umui hanamoa.

²Lohiabada ena Ruma helagana lalonai umui gini noho, iseda Dirava ena Dubu Helaga lalonai.

³Lohiabada do umui hanamoa, badina Lohiabada be ia namo. Ane dekenai iena ladana do umui hanamoa, badina ia be mai ena bogahisihisi.

⁴Badina be Lohiabada ese Iakobo ia abia hidi vadaeni, ia sibona ena. Israela taudia ia abia hidi, iena bese korikori.

⁵Lau diba Lohiabada be ia bada. Ia ese dirava ibounai ia hereaia momokani.

⁶Badina Lohiabada ese sibona ena ura ia karaia noho, guba dekenai bona tanobada dekenai danu, davara dekenai bona davara ena dobu gabudia danu.

⁷Ia ese tanobada ena kahana ibounai dekenai, medu ena ori ia havaraia noho. Ia ese iena medu ia siaia neganai, kevaru danu ia havaraia noho. Bona lai danu ia mailaia, ia haboua gabuna, guba dekena amo.

⁸Aigupito dekenai Lohiabada ese vara guna natudia ia alaia mase, taunimanima edia vara guna natudia, bona edia ubua gaudia edia vara guna natudia danu.

⁹Aigupito dekenai Lohiabada ese, hoa karadia bona toa karadia ia karaia, Aigupito ena king, bona iena hesiai taudia ibounai do ia hadikaia totona.

¹⁰Lohiabada ese bese momo ia hadikaia ore, bona ia ese, mai edia siahu bada king taudia ia alaia mase:

¹¹Sihona, Amoro taudia edia king, Oga, Basana tano ena king, bona Kanana taudia edia king ibounai.

¹²Inai king edia tano, be Lohiabada ese iena bese taudia dekenai ia henia. Israela besena dekenai edia tano ia henia.

¹³Lohiabada e, oiemu ladana be taunimanima ese do idia gwauraia hanaihanai, bona gabeai do idia vara bese taudia ese oi do idia laloatao.

¹⁴Lohiabada ese iena bese taudia do ia gwauraidia maoro. Ia ese iena hesiai taudia dekenai do ia bogahisihisi henia.

¹⁵Bese idauidau edia dirava, be siliva bona golo dekena amo idia karaia noho. Taunimanima ese edia imadia dekena amo dirava idia karadia noho.

¹⁶Idia be mai ududia, to idia hereva diba lasi. Idia be mai edia matadia, to idia itaia diba lasi.

¹⁷Idia be mai taiadia, to idia kamonai diba lasi. Idia hahodi diba lasi danu.

¹⁸Lau ura inai kaivakuku idia karaia, bona idia dekenai idia abidadama henia taudia ibounai, be unai kaivakuku hegeregerena, Lohiabada ese idia do ia halaoa.

¹⁹Israela taudia e, Lohiabada do umui hanamoa. Arona ena iduhu taudia ibounai e, Lohiabada do umui hanamoa.

²⁰Umui Levi taudia e, Lohiabada do umui hanamoa. Lohiabada dekenai umui gari henia taudia ibounai e, ia do umui hanamoa.

²¹Siona dekenai umui noho taudia e, Lohiabada do umui hanamoa. Inai be Ierusalema, Lohiabada ena noho gabuna momokani. Lohiabada do umui hanamoa!