Read Buka Helaga (Hiri Motu) 1993 SALAMO 14 Bible Online

SALAMO 14 - Buka Helaga (Hiri Motu) 1993 bible

SALAMO 14

¹Kavakava taudia ese, inai bamona idia laloa, idia gwau, “Dirava be ia noho lasi.” Idia ibounai be dika, kara mirodia idia karaia vadaeni. Kara namo karaia tauna be ta lasi.

²Lohiabada be guba dekena amo, iena matana ia negea, taunimanima edia kara ia itaia. Ia ese aonega taudia ia tahua. Ia dekenai idia tomadiho taudia ia tahua.

³To idia ibounai ese, kara dika idia karaia vadaeni. Idia ibounai be mai edia kerere. Idia ta lasi ese kara namona ia karaia. Lasi bona lasi momokani.

⁴Lohiabada ese ia henanadai, ia gwau: “Inai kara dika taudia idia diba lasi, a? Aonega do idia abia diba lasi, a? Idia ese lauegu bese taudia idia ania noho, beredi idia ania bamona. Bona lau dekenai idia guriguri lasi, lasi momokani.”

⁵To gari bada ese idia do ia dogoatao, badina Dirava be, ia dekenai idia kamonai henia taudia danu ia noho.

⁶Kara dika taudia ese, manau taudia idia hahemaraia, to Lohiabada ese, unai manau taudia ia naria noho.

⁷Egu noinoi be inai: Lau ura Israela ena hamauria dalana, be Siona dekena amo do ia mai! Lohiabada ese iena bese taudia edia mauri, be do ia hanamoa lou neganai, Israela taudia be do idia moale bada herea.