Read Buka Helaga (Hiri Motu) 1993 SALAMO 146 Bible Online

SALAMO 146 - Buka Helaga (Hiri Motu) 1993 bible

SALAMO 146

¹Lohiabada do umui hanamoa! Egu lauma e, Lohiabada do oi hanamoa!

²Egu mauri dinadia ibounai lalonai, lau ese Lohiabada do lau hanamoa. Ane dekenai, Lohiabada do lau hanamoa egu mauri dinadia ibounai lalonai.

³King taudia do umui abidadama henia lasi, badina taunimanima ese umui do idia hamauria diba lasi.

⁴Idia mase neganai tano ena kahu dekenai idia giroa lou. Edia mase dina dekenai, idia ura do idia karaia gaudia be do idia doko.

⁵Iakobo ena Dirava ese ia durua noho taudia, be idia moale noho.

⁶Lohiabada ese guba bona tanobada bona davara, bona idia lalonai gaudia ibounai ia karaia. Lohiabada ena abidadama kara bona ena momokani kara, be do ia karaia noho hanaihanai.

⁷Haida ese idia hadikaia taudia, be Lohiabada ese kota dekenai ia durudia noho, bona ogogami taudia dekenai aniani ia henia noho. Lohiabada ese dibura ruma taudia ia kokia ruhaia noho.

⁸Lohiabada ese matakepulu taudia edia matadia ia kehoa noho. Idia moru vadaeni taudia be Lohiabada ese ia abia isi noho. Iena kara maoromaoro taudia ia lalokau henidia noho.

⁹Lohiabada ese, iseda tano dekenai idia noho idau bese taudia ia gimaia noho. Lohiabada ese, vabu bona tamana sinana lasi maragidia ia naria noho, to kara dika taudia edia dala ia hadikaia noho.

¹⁰Lohiabada be King do ia noho, ela bona hanaihanai. Siona taudia e, Lohiabada be emui Dirava do ia noho, ela bona nega ibounai. Lohiabada do umui hanamoa!