Read Buka Helaga (Hiri Motu) 1993 SALAMO 147 Bible Online

SALAMO 147 - Buka Helaga (Hiri Motu) 1993 bible

SALAMO 147

¹Lohiabada do umui hanamoa! Ane dekenai Dirava do ita hanamoa be namo. Lohiabada do ita hanamoa be kara namona bona kara maorona.

²Lohiabada ese Ierusalema ia haginia lou noho. Israela taudia be guna mai guia danu idia noho, idau bese taudia edia gabu dekenai, to Lohiabada ese hari ia mailaidia lou noho.

³Edia kudoudia idia makohia taudia, be Lohiabada ese ia hagoadaia lou noho, bona edia bero ia kumia noho.

⁴Lohiabada ese hisiu edia namba ia gwauraia vadaeni, bona ia ese idia ibounai edia ladana ia atoa.

⁵Iseda Lohiabada be bada, bona mai siahu danu. Iena aonega be mai ena hetoana lasi.

⁶Lohiabada ese manau taudia ia abia isi noho, to kara dika taudia be tano dekenai ia negedia diho noho.

⁷Mai ane danu Lohiabada do umui tanikiu henia. Gita dekena amo, iseda Dirava hanamoa totona miusiki do umui gadaralaia.

⁸Guba dekenai ori momo ia atodia noho, bona tano hanamoa totona medu ia havaraia noho. Ororo dekenai rei ia hatubua noho.

⁹Boroma idauidau dekenai aniani ia henia noho, bona galo manudia idia boiboi neganai, aniani idia dekenai ia siaia noho.

¹⁰Hosi ena goada be Dirava ese ia moalelaia lasi, bona tau ena aena danu ia moalelaia lasi.

¹¹To Lohiabada ese, ia dekenai idia gari henia taudia ia moalelaia noho. Iena noho hanaihanai lalokauna dainai, ia idia abidadama henia taudia, be Lohiabada ese ia moalelaia noho.

¹²Ierusalema taudia e, Lohiabada do umui hanamoa bada. Siona taudia e, emui Dirava do umui hanamoa.

¹³Ia ese Ierusalema ena magu iduara auridia ia hagoadaia noho, bona ia ese Ierusalema idia noho taudia ia hanamoa noho.

¹⁴Emui tano hetoadia dekenai Dirava ese maino ia karaia noho, bona uiti namo herea emui uma dekenai ia hatubua noho. Unai dekena amo umui boga kunu noho.

¹⁵Tanobada dekenai oda ia siaia lao, bona iena hereva gauna be idia karaia haraga noho.

¹⁶Ia ese sinou ia siaia, tano ia koua noho, bilankesi bamona, bona ia ese hanuaboi ranu ia hakerua, aisi bamona ia lao. Bona unai aisi ia negea kava, tano ena kahu bamona.

¹⁷Medu, aisi bamona gauna, be tano dekenai ia siaia diho noho, aisi nadi bamona, bona iena lai ena keru dekenai daika ia gini diba?

¹⁸Ia ese iena oda hereva ia siaia, vadaeni aisi ia veve noho. Ia ese lai ia havaraia, vadaeni ranu ia heau diho noho.

¹⁹Iena hereva be Iakobo dekenai ia hedinaraia vadaeni. Iena taravatu bona iena oda, be Israela dekenai ia henia vadaeni.

²⁰Bese haida dekenai unai bamona ia karaia lasi. Unai idau bese taudia ese iena taravatu idia diba lasi. Lohiabada do umui hanamoa!