Read Buka Helaga (Hiri Motu) 1993 SALAMO 148 Bible Online

SALAMO 148 - Buka Helaga (Hiri Motu) 1993 bible

SALAMO 148

¹Lohiabada ena ladana do umui hanamoa! Guba dekenai, ataiai dekenai umui noho taudia ibounai e, Lohiabada do umui hanamoa.

²Lohiabada ena aneru ibounai e, Lohiabada ena ladana do umui abia isi, Lohiabada ena tuari taudia, guba dekenai umui noho, Lohiabada ena ladana do umui abia isi.

³Dina bona hua e, Lohiabada do umui hanamoa. Hisiu mai emui diaridiari e, Lohiabada do umui hanamoa.

⁴Guba ataiai momokani, Lohiabada ena ladana do umui abia isi. Guba ena ataiai dekenai ia noho ranu e, Lohiabada ena ladana do umui hanamoa.

⁵Inai gaudia ibounai ese Lohiabada ena ladana idia abia isi be namo, badina Lohiabada ese ia oda dainai, idia be idia vara.

⁶Lohiabada ena hereva dekena amo, ia ese edia gabu korikori dekenai idia ia atoa, idia noho hanaihanai. Lohiabada ese noho hanaihanai taravatu ia atoa, ta ese ia koua diba lasi gauna.

⁷Tanobada dekenai noho gaudia ese Lohiabada do idia hanamoa. Davara dekenai idia noho mauri gaudia badadia, dobu momokani gabudia dekenai gaudia ibounai danu.

⁸Kevaru bona aisi ena medu, sinou bona ori, lai goadadia, iena oda idia kamonai henia gaudia ibounai, ese Lohiabada do idia hanamoa.

⁹Ororo badadia bona maragidia ibounai, huahua audia bona sida audia ibounai.

¹⁰Uda boroma ibounai, bona boromakau ibounai, gaigai bona huala gaudia, bona ataiai manudia ibounai, Lohiabada ena ladana do umui hanamoa.

¹¹King ibounai, bona bese ibounai, king ena natuna taudia, bona lohia taudia idauidau ibounai.

¹²Ulato bona uhau, buruka taudia, bona natuna maragidia danu,

¹³namona be idia ibounai ese, Lohiabada ena ladana do idia hanamoa bada! Iena ladana badana ese, taunimanima ibounai edia ladana badana ia hereaia noho. Iena hairaina be ataiai momokani, ia ese tanobada bona guba ia hereaia noho.

¹⁴Lohiabada ese Israela taudia ia lalokau henia momokani, vadaeni ia ese idia ia hagoadaia momokani. Unai dainai iena bese taudia ese iena ladana idia abia isi noho. Lohiabada ena ladana do umui hanamoa!