Read Buka Helaga (Hiri Motu) 1993 SALAMO 149 Bible Online

SALAMO 149 - Buka Helaga (Hiri Motu) 1993 bible

SALAMO 149

¹Lohiabada do umui hanamoa! Lohiabada dekenai ane matamatana do umui abia. Lohiabada idia abidadama henia taudia edia hebou dekenai, ia do umui hanamoa.

²Israela taudia ese, idia ia karaia Diravana do idia moalelaia. Siona taudia ese edia King do idia moalelaia be namo.

³Iena ladana do idia hanamoa mai edia mavaru danu. Tareko bona gita ena regena dekena amo, Lohiabada do idia hanamoa,

⁴badina be Lohiabada ese, iena bese taudia ia moalelaia noho momokani. Ia ese manau taudia dekenai kwalimu ia henia noho.

⁵Dirava ena taudia ese, edia kwalimu dainai do idia moale noho be namo. Hanuaboi ena hora ibounai lalonai, ane do idia abia be namo.

⁶Namona be mai boiboi bada danu Dirava do idia hanamoa. Bona matadia rua tuari kaia, be edia imadia dekenai do idia dogoatao noho,

⁷idia ese bese idauidau do idia halusia totona, ma bese idauidau taudia do idia matakani henia totona.

⁸Unai bese king taudia be auri dekena amo do idia guia, bona edia lohia taudia be auri seini dekena amo do idia guia.

⁹Io, iena bese taudia dekena amo, Dirava ese ia gwauraia vadaeni kerere davana, be unai bese idauidau dekenai do ia henia. Dirava idia abidadama henia taudia ibounai, be inai bamona do idia kwalimu. Lohiabada do umui hanamoa!