Read Buka Helaga (Hiri Motu) 1993 SALAMO 17 Bible Online

SALAMO 17 - Buka Helaga (Hiri Motu) 1993 bible

SALAMO 17

¹Lohiabada e, kota maoromaoro totona lau noinoi inai, mani lau dekenai do oi kamonai. Oiemu durua totona lau noinoi noho, egu taitai mani do oi kamonai, badina inai guriguri lau gwauraia, mai egu laloa maoromaoro bona momokani.

²Oi ese egu kota dekenai, kwalimu lau dekenai do oi henia, badina oiemu laloa bona oiemu kara, be nega ibounai ia maoromaoro.

³Oi ese egu kudouna oi diba. Oi ese hanuaboi neganai, lau dekenai oi vadivadi henia. Oi ese egu lalona oi tahua namonamo vadaeni, bona ura dikana ta, be lau dekenai oi davaria lasi.

⁴Taunimanima haida ese, hereva dika idia gwauraia noho, to lau be lasi momokani. Lau ese oiemu oda hereva, be lau kamonai henia vadaeni, bona dagedage taudia edia kara lau karaia lasi.

⁵Lau be nega ibounai, oiemu dala dekenai lau raka, bona nega ta inai dala dekena amo, lau raka siri lasi.

⁶Dirava e, oi dekenai lau guriguri noho, badina oi ese lau dekenai oi haere noho. Unai dainai egu hereva mani do oi kamonai.

⁷Oiemu lalokau momokani, mani do oi hedinaraia, bona ai do oi hamauria. Bema oi be ai dekenai oi noho, ai dekenai idia tuari henia taudia ese, ai do idia hadikaia diba lasi.

⁸Lohiabada e, lau do oi gimaia, oiemu matana oi gimaia noho bamona. Oiemu hanina edia henunai lau do oi hunia.

⁹Tau dikadia edia tuari, dekena amo lau do oi gimaia. Lau idia hamasea gwauraia taudia, ese lau idia hagegea noho.

¹⁰Idia be mai edia bogahisihisi lasi, bona mai hekokoroku danu idia hereva noho.

¹¹Idia ese lau idia lulua vadaeni, bona hari lau idia hagegea noho. Idia ese lau idia itaia noho, tano dekenai lau do idia veria diho totona.

¹²Idia be laiona idia hitolo bamona, idia naria noho, lau do idia darea parara totona.

¹³Lohiabada e, oi mai, lau idia hadikaia gwauraia taudia do oi koua. Oi ese idia do oi halusia! Oiemu tuari kaia dekena amo, unai tau dikadia dekena amo, lau do oi hamauria.

¹⁴Lohiabada e, oiemu imana dekena amo, unai taudia do oi koua, bona lau do oi hamauria. Badina inai taudia edia ura gaudia, bona edia ahuna danu, be inai tanobada sibona dekenai idia tahua noho. Oiemu kohu momo dekena amo, unai taudia oi hahonudia vadaeni. Unai dainai idia edia natudia tau be momo herea, bona idia mase neganai, edia natudia be do mai edia kohu momo danu.

¹⁵To lau be kara maoromaoro lau karaia dainai, lau ese oiemu vairana do lau itaia, bona do lau noga neganai, oiemu toana do lau itaia dainai, do lau moale momokani.