Read Buka Helaga (Hiri Motu) 1993 SALAMO 19 Bible Online

SALAMO 19 - Buka Helaga (Hiri Motu) 1993 bible

SALAMO 19

¹Guba ese Dirava ena hairaina ia hedinaraia, bona guba dekenai noho gaudia ese, Dirava ia karaia gaudia idia hedinaraia noho.

²Dina ta ese, ia murinai dinana dekenai, Dirava ia herevalaia noho. Hanuaboi ta ese, ia murinai hanuaboina dekenai, Dirava ena aonega ma ia herevalaia.

³Edia gado ena regena be lasi, bona edia hereva be ita kamonai lasi.

⁴To idia gwauraia gaudia, be tanobada kahana ibounai dekenai idia lao vadaeni. Edia hereva be tanobada ena gabu ibounai, dekenai idia ginidae vadaeni. Dirava ese guba dekenai, dina ena noho gabuna ia karaia.

⁵Daba neganai dina ia hedinarai mai, headava matamata tauna, be iena ruma dekena amo ia hedinarai bamona, ma heau helulu goada tauna, be mai moale bada danu ia heau noho bamona.

⁶Guba ena dokona ta, dekena amo ia daekau noho, vadaeni ia hanaia noho, ela bona guba ena dokona ta. Gau ta be iena siahu dekena amo ia hunia diba lasi.

⁷Lohiabada ena Taravatu be ia namo momokani. Ia ese taunimanima edia lauma ia hamauria lou. Lohiabada ena hadibaia hereva be momokani vadaeni. Idia ese aonega lasi taudia dekenai, aonega idia henia.

⁸Lohiabada ena Taravatu be idia maoromaoro vadaeni. Unai Taravatu idia badinaia taudia ese, moale idia davaria noho. Lohiabada ena oda be diari hegeregerena. Idia ese taunimanima edia laloa idia hadiaria.

⁹Lohiabada dekenai idia tomadiho taudia, ese kara namona idia karaia noho. Bona inai bamona kara, be nega hanaihanai do ia noho. Lohiabada ena kota henia karana be momokani, bona nega ibounai, Lohiabada ena kota davana be maoromaoro.

¹⁰Lohiabada ena hereva ese, golo ena namo idia hereaia. Golo namona momokani idia hereaia. Unai hereva edia mamina namona ese, hani namona ena mamina ia hereaia. Unai dainai do ita ura henidia, be gau badana momokani.

¹¹Lohiabada e, oiemu Taravatu ese, lau, oiemu hesiai tauna dekenai, sisiba namona idia henia. Lau ese idia lau badinaia neganai, noho mauri namona momokani lau davaria.

¹²To edena tauna ese, sibona ena kerere karadia ia diba? Mani emu kara lauegu kara dika, hunia gaudia, do oi gwauatao.

¹³Bona lau do oi durua, vadaeni egu hekokoroku dainai, kara dika do lau karaia lasi. Mani lau do oi naria, vadaeni lauegu kara dika ese, lau do idia biagua lasi. Unai neganai lau be kerere lasi, ma kara dika badana ta do lau karaia lasi.

¹⁴Lohiabada e, oi be lauegu Nadi Gini Gabuna, bona egu Hamauria Tauna. Mani lau do oi durua, vadaeni lauegu uduna ena hereva, bona lauegu kudouna ena laloa, be do idia namo, oiemu vairana dekenai.