Read Buka Helaga (Hiri Motu) 1993 SALAMO 24 Bible Online

SALAMO 24 - Buka Helaga (Hiri Motu) 1993 bible

SALAMO 24

¹Tanobada bona ia lalonai noho gaudia ibounai, be Lohiabada ena. Tanobada bona ia lalonai noho taunimanima, ibounai be Lohiabada ena.

²Badina be ia sibona ese tanobada ia haginia, tano henunai ia noho ranu dobudia edia latanai. Ia ese tanobada ena badina, be davara ena dobu gabudia dekenai ia atoa.

³Daika ese Lohiabada ena ororo, dekenai do ia daekau lao? Daika ese iena gabu helagana lalonai do ia gini?

⁴Kara goevagoeva, bona laloa goevagoeva taudia sibona ese. Dirava koikoi idia tomadiho henia lasi, bona idia gwauhamata koikoi lasi taudia ese.

⁵Lohiabada ese, unai bamona taudia do ia hanamoa bona hamauria, Lohiabada ese idia do ia gwauraia, idia be kerere lasi.

⁶Unai bamona taudia ese Dirava idia tahua noho, idia ura Iakobo ena Dirava ena vairanai idia gini.

⁷Ikoukou do umui kehoa namonamo, bona idaunegai iduara danu do umui kehoa. Vadaeni King Badana do ia raka vareai.

⁸Inai King Badana be daika? Ia be Lohiabada, mai ena goada, bona mai ena siahu danu. Ia be Lohiabada, tuari dekenai ia kwalimu noho.

⁹Ikoukou do umui kehoa namonamo, bona idaunegai iduara danu do umui kehoa bada, vadaeni King Badana be do ia raka vareai.

¹⁰Inai King Badana be daika? Siahu Ibounai Lohiabada, ia be King Badana momokani.