Read Buka Helaga (Hiri Motu) 1993 SALAMO 25 Bible Online

SALAMO 25 - Buka Helaga (Hiri Motu) 1993 bible

SALAMO 25

¹Lohiabada e, oi dekenai egu lauma lau abia isi inai.

²Egu Dirava e, oi dekenai lau abidadama henia noho. Lau do oi durua, vadaeni hemarai do lau davaria lasi. Lau do oi durua, vadaeni lau idia hadikaia gwauraia taudia ese, lau do idia kirikirilaia lasi!

³Badina oi dekenai idia abidadama taudia, be do idia moru lasi, to edia abidadama idia rakatania kava taudia, be moru ena hemarai do idia abia.

⁴Lohiabada e, oiemu kara lau dekenai do oi hadibaia. Oiemu dala lau dekenai do oi hedinaraia.

⁵Oiemu hereva momokani ena dala dekenai, lau do oi hakaua, bona inai hereva momokani, be lau dekenai do oi hadibaia. Badina oi be egu Dirava, oi ese lau oi hamauria noho. Nega ibounai oi dekenai lau abidadama henia noho.

⁶Lohiabada e, oiemu bogahisihisi, bona oiemu noho hanaihanai lalokauna, be do oi laloa noho, badina oi ese idaunegai ia mai bona hari, inai kara taunimanima dekenai oi karaia.

⁷Lau uhau neganai kara dika lau karaia gaudia, bona egu kerere danu, be mani do oi gwauatao. Lohiabada e, oiemu noho hanaihanai lalokauna dainai, lau dekenai do oi laloa namo, badina oiemu kara be namo.

⁸Lohiabada be namo bona maoromaoro. Unai dainai ia ese kara dika taudia dekenai, iena dala ia hadibaia noho.

⁹Ia ese hekokoroku lasi taudia, be dala maoromaoro dekenai ia hakaudia noho. Ia ese manau taudia dekenai, iena dala ia hadibaia noho.

¹⁰Iena taravatu bona iena hadibaia hereva, idia badinaia bona kamonai henia taudia, be Lohiabada ese, mai lalokau bona mai momokani danu, do ia hakaudia lao noho.

¹¹Lohiabada e, oiemu ladana dainai, egu kara dika do oi gwauatao, badina egu kara dika be bada.

¹²Edena tau ese Lohiabada ia gari henia noho? Lohiabada ese unai tau dekenai, iena raka dala maorona do ia hadibaia.

¹³Unai tau ese kohu momo do ia abia, bona iena natuna ese, tano do idia abia, edia tano.

¹⁴Lohiabada idia gari henia taudia, be Lohiabada ese idia dekenai, iena hunia gaudia ia hadibaia noho. Lohiabada ese danu idia dekenai, iena gwauhamata taravatuna ena anina ia hadibaia noho.

¹⁵Nega ibounai, Lohiabada dekenai egu matana lau negea noho, lau do ia durua totona, bona ia ese mase bona gari gaudia dekena amo, lau ia hamauria noho.

¹⁶Lohiabada e, lau dekenai do oi laloa, lau dekenai do oi bogahisihisi, badina lau be sibona lau noho, bona lau manoka noho.

¹⁷Lauegu lalohisihisi do oi hadokoa, bona egu hisihisi dekena amo lau do oi hamauria.

¹⁸Egu laloa hekwarahi bona egu laloa metau do oi laloa, bona egu kara dika ibounai mani do oi gwauatao.

¹⁹Do oi laloa, lau idia hadikaia gwauraia taudia, be idia momo herea, bona edia badu be auka herea lau dekenai.

²⁰Egu mauri do oi gimaia, bona lau do oi hamauria. Lau do oi durua, vadaeni hemarai do lau davaria lasi, badina egu heau mauri gabuna be oi.

²¹Lohiabada e, egu kara momokani bona kara maoromaoro dainai, lau do oi gimaia, badina oi dekenai lau abidadama noho.

²²Dirava e, edia hisihisi ibounai dekena amo, oiemu bese Israela taudia do oi hamauria.