Read Buka Helaga (Hiri Motu) 1993 SALAMO 26 Bible Online

SALAMO 26 - Buka Helaga (Hiri Motu) 1993 bible

SALAMO 26

¹Lohiabada e, lau do oi gwauraia kerere lasi, badina be lau ese kara maoromaoro lau karaia vadaeni, bona lau ese oi dekenai, lau abidadama henia momokani vadaeni.

²Lohiabada e, lau do oi tahua bona tohoa, bona egu kara do oi itaia. Egu ura bona egu laloa danu do oi tahua.

³Badina be oiemu noho hanaihanai lalokauna, be egu vairana dekenai lau itaia noho, bona oi dekenai abidadama henia kara ena dala dekenai, lau raka noho nega ibounai.

⁴Koikoi taudia danu lau helai noho lasi, bona kara maoromaoro koikoi taudia danu, be lau haboua tamona lasi.

⁵Kara dika taudia edia hereva hebou, be lau ura lasi momokani, bona kerere taudia dekena amo lau noho siri.

⁶Lohiabada e, egu imana lau huria noho, egu maoromaoro bona kerere lasi do lau hedinaraia totona, bona oiemu boubou patana lau raka hagegea noho.

⁷Unai neganai oi hanamoa totona ane lau abia, bona oiemu kara badadia, lau gwauraia hedinarai noho.

⁸Lohiabada e, oi noho Ruma, be lau ura henia noho. Oiemu hairaina ia noho gabuna, be lau lalokau henia noho.

⁹Kara dika taudia danu nega tamona, be egu lauma do oi hadikaia ore lasi. Ala-ala taudia danu be lau do oi hamasea lasi.

¹⁰Idia be kara dika idia karaia noho nega ibounai, bona nega ibounai gagevagageva karadia idia karaia noho, moni do idia davaria totona.

¹¹To lau be kara maoromaoro lau karaia noho. Lau dekenai do oi bogahisihisi henia, bona lau do oi hamauria.

¹²Lau gini goada noho, bona lau hadikaia totona gauna ta ia noho lasi. Lohiabada e, oiemu bese taudia, edia hebou badana lalonai, lau ese oi do lau hanamoa bada.