Read Buka Helaga (Hiri Motu) 1993 SALAMO 29 Bible Online

SALAMO 29 - Buka Helaga (Hiri Motu) 1993 bible

SALAMO 29

¹Guba ena siahu taudia e, Lohiabada do umui hanamoa. Iena hairaina bona iena siahu do umui hanamoa.

²Lohiabada ena ladana ena hairaina do umui hanamoa. Helaga Bada Lohiabada ia hedinaraia neganai, do umui tomadiho henia.

³Lohiabada ena gadona, be davara ena latanai idia kamonaia noho. Hairai ena Dirava ese, guba boiboi lalonai ia hereva noho. Lohiabada ena gadona be davara badana ena latanai.

⁴Lohiabada ena gadona be mai ena siahu. Lohiabada ena gadona be King Badana ena gadona.

⁵Lohiabada ena gadona ese, sida audia ia makohia noho. Lohiabada ese Lebanona ena sida audia ia makohia noho.

⁶Ia ese Lebanona ena ororo ia hamarerea, idia be boromakau natudia bamona idia roho noho. Heremona Ororo danu, be Lohiabada ese ia hamarerea, ia be uda boromakau natuna tau bamona ia roho noho.

⁷Lohiabada ena gadona ese kevaru, lahi bamona ia havaraia noho.

⁸Lohiabada ena gadona ese, tano kaukau gabudia ia hamarerea noho. Kadesi ena tano kaukau ia hamarerea noho.

⁹Lohiabada ena gadona ese, dia hahine edia mara ia havaraia noho. Lohiabada ena gadona ese au ena raurau ia hodaia, ia kokidia momokani. Bona iena Dubu Helaga lalonai, taunimanima ibounai idia boiboi, idia gwau, “Lohiabada ita hanamoa!”

¹⁰Lohiabada ese ranu dobu abata badana ia biagua noho. Lohiabada be iena terona dekenai ia helai noho, bona do ia King ela bona hanaihanai.

¹¹Lohiabada ese iena bese taudia dekenai goada ia henia noho, bona ia ese iena orea taudia, be maino dekena amo ia hanamodia noho.