Read Buka Helaga (Hiri Motu) 1993 SALAMO 3 Bible Online

SALAMO 3 - Buka Helaga (Hiri Motu) 1993 bible

SALAMO 3

¹Lohiabada e, lau dekenai idia dagedage taudia be momo herea. Lau dekenai idia tuari henia taudia, be idia momo lao noho.

²Idia ese lau idia herevalaia noho. Idia gwau, “Dirava ese ia do ia durua lasi.”

³To Lohiabada e, oi ese dika dekena amo lau oi gimaia noho. Oi ese kwalimu lau dekenai oi henia noho. Oi ese egu lalona oi hagoadaia lou.

⁴Lohiabada dekenai durua totona lau boiboi noho, bona iena ororo helagana dekena amo, lau dekenai ia haere henia.

⁵Lau hekure, lau mahuta, bona lau noga lou, bona hanuaboi ena negana ibounai, Lohiabada ese lau ia naria noho.

⁶Taunimanima 1000, 1000 dekenai lau gari lasi. Egu kahana kahana dekena amo, lau dekenai idia tuari henia noho, to lau gari henidia lasi.

⁷Lohiabada e, lau dekenai do oi mai. Egu Dirava e, lau do oi hamauria. Lau dekenai idia tuari henia taudia, edia dika davana do oi henia. Do idia manoka lao, vadaeni lau do idia hadikaia diba lasi.

⁸Lohiabada e, oi sibona ese ai oi hamauria diba. Oi ese oiemu bese taudia oi hanamoa noho.