Read Buka Helaga (Hiri Motu) 1993 SALAMO 45 Bible Online

SALAMO 45 - Buka Helaga (Hiri Motu) 1993 bible

SALAMO 45

¹Hereva namo herea be egu lalona idia hahonua noho, badina lau ese king totona inai ane lau karaia. Egu malana ese ane namona ia abia noho, sivarai torea dekenai ia manada herea tauna ena peni, ese ia karaia bamona.

²King e, oiemu hairaina ese, taunimanima ibounai edia hairaina ia hereaia noho. Oiemu hereva be hariharibada dekena amo idia honu momokani, badina be Dirava ese, oi do ia hanamoa noho ela bona hanaihanai.

³King mai goadana e, oiemu tuari kaia be gaba gauna dekenai do oi kwatua. Oi be mai hairaina, bona mai oiemu king siahuna danu.

⁴Oiemu hosi dekenai do oi guia, bona mai king siahuna danu do oi lao, do oi kwalimu. Hereva momokani bona kara maoromaoro gimaia totona, do oi tuari lao. Oiemu goada ese, hoa karadia mai garidia danu do ia hedinaraia.

⁵Oiemu peva ena diba be mai edia matana, idia ese king idia hadikaia gwauraia taudia, edia kudouna do idia gwadaia. Bese idauidau taudia be oiemu aena henunai do idia moru.

⁶Oiemu basileia, Dirava ese oi dekenai ia henia basileia, be do ia noho ela bona hanaihanai. Oiemu basileia taudia, be mai kota maoromaoro danu do oi biagua noho.

⁷Kara maoromaoro oi ura henia noho, bona kara dika oi badu henia noho. Unai dainai Dirava, oiemu Dirava, ese oi ia abia hidi vadaeni, bona ia ese moale bada, be oi dekenai ia henia vadaeni. Inai moale ese king haida edia moale ia hereaia noho.

⁸Oiemu dabua dekena amo muro bona aloe bona kasia muramura, edia bonana ia daekau noho. Oiemu ruma badana, aivori ese ia hanamoa rumana lalonai, miusiki taudia ese oi do idia hamoalea.

⁹King haida edia natudia hahine, be oiemu ruma hahine edia huanai idia noho, bona oiemu terona ena idiba kahana dekenai, kwini ia gini noho. Kwini ena herahera be golo namo herea gaudia.

¹⁰King ena headava matamata kekeni e, mani oi laloa, bona egu hereva do oi kamonai. Oiemu bese taudia bona oiemu tamana ena ruma do oi laloaboio,

¹¹vadaeni king ese oiemu hairaina do ia ura henia. Ia be oiemu lohia tauna dainai, ia dekenai do oi kamonai henia.

¹²Turo taudia ese, oi dekenai harihari gaudia do idia mailaia, bona kohu momo taudia ese, oiemu laloa namo totona, oi dekenai do idia noinoi.

¹³King ena kekeni be mai hairaina, iena daiutu lalonai ia noho. Iena dabua be golo varo dekena amo idia hatua karaia.

¹⁴King ena kekeni ese, dabua namo herea ia karaia noho, be king ena vairana dekenai idia hakaua vareai. Iena durua kekeni taudia danu, be iena murinai idia raka noho, king ena vairanai.

¹⁵Mai moale bada danu idia ese, king ena ruma dekenai idia raka vareai noho.

¹⁶Egu king e, oi ese natuna tau momo do oi abia. Idia ese oiemu tamana bona tubuna edia king dagi, be do idia abia, bona tanobada kahana ibounai dekenai, king taudia do oi halaodia.

¹⁷Egu ane ese oiemu ladana do ia habadaia momokani, ela bona nega ibounai, bona taunimanima ibounai ese, oi do idia hanamoa ela bona hanaihanai.