Read Buka Helaga (Hiri Motu) 1993 SALAMO 46 Bible Online

SALAMO 46 - Buka Helaga (Hiri Motu) 1993 bible

SALAMO 46

¹Dirava be iseda heau mauri gabuna, bona ia ese ita dekenai goada ia henia. Iseda nega dika negadia ibounai ita dekenai ia noho, ita do ia durua totona.

²Unai dainai ita be do ita gari lasi, dika ia vara neganai. Tano be sedira do ia mareremarere bada, bona ororo be do idia kokia, davara lalonai do idia moru, to ita be do ita gari lasi.

³Sedira davara ranu be do ia hurehure bada, bona regena bada do ia karaia. Bona unai davara ena hurehure dainai, ororo do idia heudeheude, to ita be do ita gari lasi.

⁴Dirava ena hanua be Siahu Ibounai Dirava ena gabu helagana. Sinavai badana ta be unai hanua ena huanai ia heau noho. Bona unuseni idia noho taudia ese, unai sinavai idia moalelaia.

⁵Dirava be unai hanua lalonai ia noho, unai dainai unai hanua be idia makohia diba lasi. Dirava ese daba maragi neganai unai hanua do ia durua.

⁶Tanobada ena bese taudia idauidau, be idia heai noho bona heatu noho. Bese ta ta edia king bona edia taunimanima idia moru. Dirava be iena guba boiboi dekena amo iena gadona ia abia isi, vadaeni tano be ia veve, ranu bamona ia lao.

⁷Siahu Ibounai Lohiabada be ita dekenai ia noho. Iakobo ena Dirava be iseda heau mauri gabuna.

⁸Umui mai! Lohiabada ena gaukara do umui itaia. Tanobada dekenai hadikaia karadia momo ia karaia vadaeni.

⁹Tuari be Dirava ese ia hadokoa noho, tanobada kahana ibounai dekenai. Ia ese peva ia makohia noho, bona io be ia ese ia hakwaidua noho. Kariota be ia ese lahi dekenai ia gabua noho.

¹⁰Lohiabada be inai bamona ia hereva, ia gwau, “Tuari do umui hadokoa, bona do umui diba momokani lau be Dirava. Bese idauidau ibounai ese lau do idia hanamoa. Tanobada taudia ibounai ese, lau do idia gwauraia King Badana momokani.”

¹¹Siahu Ibounai Dirava be ita dekenai ia noho. Iakobo ena Dirava be iseda heau mauri gabuna.