Read Buka Helaga (Hiri Motu) 1993 SALAMO 47 Bible Online

SALAMO 47 - Buka Helaga (Hiri Motu) 1993 bible

SALAMO 47

¹Bese idauidau taudia ibounai e, mai hanamoa danu emui imana do umui patapataia. Dirava do umui hanamoa, mai ane bona boiboi danu.

²Badina Lohiabada be Siahu Ibounai Dirava, ia be mai garina. Ia be King Badana momokani. Tanobada taudia ibounai, be ia ese ia biagua noho.

³Ia ese ita dekenai kwalimu ia henia, bona bese idauidau be iseda aena henunai ia atodia. Orea idauidau be Lohiabada ese ia hamanadaia, ita henunai ia atodia.

⁴Dirava ese tano ta ia abia hidi, bona ita dekenai ia henia. Ita be Iakobo ena tubuna, Dirava ese ita ia lalokau henia. Inai tano be iseda tano dainai, iniseni do ita noho, mai moale danu.

⁵Dirava be guba dekenai ia daekau lao. Lohiabada ia daekau neganai, taunimanima be mai moale bada danu idia boiboi, bona kibi idia hiriria.

⁶Dirava do umui hanamoa, ane do umui abia, ia dekenai hanamoa totona. Iseda King Badana do umui hanamoa ane dekenai,

⁷badina Dirava be tanobada ibounai edia King. Ane dekenai do ita hanamoa!

⁸Dirava be iena terona helagana dekenai ia helai noho. Ia ese tanobada bese ibounai ia biagua noho.

⁹Bese idauidau edia lohia taudia idia haboua noho. Idia ese Aberahamo ena Dirava ena bese taudia danu, do idia haboua tamona lao, badina be tanobada taudia edia king ibounai, be Dirava ena henunai idia noho. Ia ese king ibounai bona taunimanima ibounai ia biagua noho.