Read Buka Helaga (Hiri Motu) 1993 SALAMO 55 Bible Online

SALAMO 55 - Buka Helaga (Hiri Motu) 1993 bible

SALAMO 55

¹Dirava e, egu guriguri do oi kamonai. Egu noinoi do oi negea lasi.

²Lau dekenai do oi kamonai, bona lau dekenai do oi haere. Egu laloa hekwarahi dainai lau manoka vadaeni.

³Lau idia hadikaia gwauraia taudia edia hereva dekenai, lau gari bada herea noho. Kara dika taudia edia dagedage ese, lau idia hadikaia noho. Idia ese lau dekenai hisihisi idia havaraia noho. Idia ese lau idia badu henia noho.

⁴Egu kudouna be gari dainai ia hisihisi noho. Mase ena gari be egu latanai ia ginidae vadaeni.

⁵Gari bona heudeheude ese lau ia dogoatao noho. Egu lauma be ia gari bona ia hoa dainai, egu goada ia ore.

⁶Lau gwau, “Bema lau be mai egu hanina, pune manu bamona, lau be do lau roho lao, bona gabu ta dekenai do lau laga-ani.

⁷Gabu daudau dekenai do lau roho lao, bona taunimanima idia noho lasi gabuna dekenai do lau noho.

⁸Do lau roho lao haraga, lai guba, bona medu bada ia diho lasi gabuna do lau tahua. Unuseni do lau noho namonamo.”

⁹Lohiabada e, lau dekenai idia kara dika taudia, be mani do oi hadikaia, vadaeni edia herevahereva dekena amo, daradara do idia davaria. Badina be ala-ala bona heatu, be hanua badana lalonai lau itaia noho.

¹⁰Dina lalonai bona hanuaboi lalonai danu, dika taudia ese hanua ena magu idia raka hagegea noho. Hanua ena lalonai danu, be kara dikadia bona laloa hekwarahi momo.

¹¹Hanua ena lalonai, be ala-ala bona henaoa karadia momo idia vara noho. Hanua ena ariara dekenai, koikoi karadia bona taunimanima hagaria hereva, be idia vara noho, doko lasi.

¹²Bema lau ia hadikaia gwauraia tauna ese, lau ia kirikirilaia neganai, lau ese unai kara dekenai lau haheauka diba. Bema lau ia tuari henia tauna ese, lau dekenai hekokoroku hereva ia gwauraia neganai, lau ese ia dekena amo do lau hunia diba.

¹³To tauna be oi, lau bamona tauna. Oi be lauegu turana korikori, lau dekenai noho hebou tauna.

¹⁴Guna ita herevahereva mai moale danu, bona Dubu Helaga lalonai Dirava ita tomadiho henia hebou.

¹⁵Lau idia hadikaia gwauraia taudia dekenai, mase do ia ginidae haraga be namo. Idia ese do mai mauri danu, mase taudia edia gabu dekenai, do idia diho lao be namo! Badina dika be edia kudoudia lalonai, bona edia rumadia lalonai danu dika ia noho.

¹⁶To lau be durua totona, Lohiabada dekenai do lau boiboi henia. Lohiabada ese lau do ia hamauria.

¹⁷Adorahi neganai, daba neganai, bona dina tubua neganai, lau ese Lohiabada dekenai lau taitai henia, bona ia ese egu gadona do ia kamonai henia.

¹⁸Lohiabada ese lau do ia naria namonamo, vadaeni lau dekenai idia tuari henia taudia momo, do lau tuari henidia murinai, Lohiabada ese, mai mauri danu egu ruma dekenai lau do ia hakaua mai lou.

¹⁹Dirava, gunaguna momokani ia mai bona hari ia noho Diravana ese, egu noinoi do ia kamonai. Ia ese lau idia tuari henia taudia do ia halusia, badina be iena taravatu idia kamonai henia lasi, bona idia ese Dirava idia gari henia lasi.

²⁰Egu turana ese iena gwauhamata ia makohia. Ia ese iena turana ia heatu henia.

²¹Iena hereva be manadamanada, bata ena manadamanada bamona, to iena kudouna lalonai tuari ia noho. Iena hereva be manokamanoka, olive dehoro ena manokamanoka bamona, to unai hereva be tuari kaia mai matana momokani.

²²Oiemu laloa hekwarahi be Lohiabada dekenai do oi henia, bona ia ese idia dekena amo oi do ia durua. Ia ese kara maoromaoro taudia ia durua noho. Idia be do idia moru lasi, lasi momokani.

²³To Lohiabada e, oi ese unai ala-ala bona koikoi taudia do oi siaia diho, henunai momokani guri dekenai do idia lao. Unai bamona dika taudia ese, edia mauri dinadia kahana sibona idia ore neganai, do idia mase, to lau ese oi dekenai do lau abidadama henia noho.