Read Buka Helaga (Hiri Motu) 1993 SALAMO 61 Bible Online

SALAMO 61 - Buka Helaga (Hiri Motu) 1993 bible

SALAMO 61

¹Dirava e, egu taitai do oi kamonai. Egu guriguri mani do oi abia dae.

²Egu kudouna ena goada ia ore, bona lau be egu gabu korikori dekena amo daudau lau noho. Unai dainai oi dekenai lau boiboi noho inai! Mani emu kara, heau mauri gabu namona, egu goada ia hereaia Nadi Badana dekenai, lau do oi hakaua lao.

³Badina Lohiabada e, oi be egu heau mauri gabuna. Oi be lauegu kohoro, bona oi ese lau idia hadikaia gwauraia taudia oi koua noho.

⁴Oiemu Ruma lalonai do lau noho ela bona hanaihanai. Lohiabada e, mani emu kara oiemu hanina edia henunai lau do oi hunia, do lau mauri totona.

⁵Badina be Dirava e, egu gwauhamata be oi ese oi kamonai vadaeni, bona oi ese, oiemu ladana idia matauraia taudia edia davana namona, be lau dekenai oi henia vadaeni.

⁶Dirava e, king ena mauri lagani do oi halataia. Iena mauri do oi hanamoa, vadaeni lagani momo do ia mauri noho.

⁷Dirava e, mani emu kara king ese, oiemu vairana dekenai do ia lohia karaia noho. Oi ese oiemu noho hanaihanai lalokauna, bona oiemu momokani dekena amo, king do oi gimaia noho.

⁸Unai dainai lau ese ane dekenai, oiemu ladana do lau hanamoa, bona dina ta ta ibounai, egu gwauhamata gaudia oi dekenai, be do lau karaia momokani.