Read Buka Helaga (Hiri Motu) 1993 SALAMO 66 Bible Online

SALAMO 66 - Buka Helaga (Hiri Motu) 1993 bible

SALAMO 66

¹Tanobada taudia ibounai, Dirava dekenai do umui boiboi henia mai moale bada danu.

²Iena ladana hanamoa totona ane do umui abia, ia dekenai hairai bona hanamoa do umui henia.

³Dirava dekenai do umui gwau, “Oiemu kara be mai gari danu gaudia. Oiemu siahu ia bada herea dainai, oi dekenai idia tuari henia taudia, be oiemu vairana dekenai mai gari danu, oiemu siahu henunai sibodia idia atoa.

⁴Tanobada taudia ibounai ese oi dekenai idia tomadiho henia noho. Oi hanamoa totona ane idia abia noho. Oiemu ladana hanamoa totona ane idia abia noho.”

⁵Umui mai, Dirava ena kara do umui itaia. Iena kara taunimanima edia huanai be mai garina karadia.

⁶Davara be tano kaukauna dekenai ia halaoa. Ma aiemai sene taudia ese aena dekena amo sinavai idia raka hanaia. Unai Dirava ese ia karaia gaudia dainai ita moale bada noho.

⁷Dirava ese iena siahu dekena amo do ia King hanaihanai. Iena matana ese bese idauidau ibounai idia itaia noho. Dirava e, oi dekenai idia dagedage taudia, be do oi koua, vadaeni do idia hekokoroku lasi.

⁸Bese idauidau taudia e, iseda Dirava do umui hanamoa. Ane do umui abia goada, Dirava umui hanamoa badabada, taunimanima do idia kamonai totona.

⁹Ia ese iseda mauri ia naria vadaeni. Ia ese iseda aena ia naria, vadaeni ita moru lasi.

¹⁰Dirava e, oi ese ai oi tohoa vadaeni. Siliva idia tohoa noho bamona, be oi ese ai oi tohoa vadaeni.

¹¹Tarapu dekena amo oi ese ai oi abia, bona maduna metaudia aiemai dorudia dekenai oi atoa vadaeni.

¹²Ai dekenai idia tuari taudia, be oi ese oi koua lasi dainai idia ese ai idia hadikaia. Ai be lahi ai raka hanaia, bona ranu danu, to hari be mauri gabuna dekenai oi ese ai oi hakaua mai vadaeni.

¹³Lau ese gabua boubou gaudia, be oiemu Dubu Helaga lalonai do lau mailaia, bona oi dekenai lau gwauhamata do lau henia gauna, ena anina do lau karaia.

¹⁴Hisihisi lau dekenai ia vara neganai, gwauhamata oi dekenai lau gwauraia gauna, be do lau karaia momokani.

¹⁵Ubua gaudia namodia oi dekenai do lau henia, boubou patana dekenai do idia gabudia ore totona. Mamoe tau haida danu do lau gabua ore. Boromakau tau bona nanigosi tau danu, edia kwalahu be guba dekenai do ia daekau lao.

¹⁶Dirava dekenai umui gari taudia ibounai e, umui mai, umui kamonai. Dirava ese lau dekenai ia karaia gaudia, be umui dekenai do lau gwauraia hedinarai.

¹⁷Lau ese Dirava dekenai lau boiboi henia, bona ane dekena amo lau hanamoa bada.

¹⁸Bema kara dika be egu kudouna dekenai lau hunia neganai, Lohiabada ese egu noinoi do ia kamonai henia lasi.

¹⁹To momokani Dirava ese ia kamonai vadaeni. Ia ese egu noinoi hereva ia abia dae vadaeni.

²⁰Dirava do lau hanamoa, badina egu noinoi ia negea lasi. Iena noho hanaihanai lalokauna, be lau dekena amo ia kokia lasi.